Уолбутугар, Станислав Свинобоевка ситиһиилээх кыттыыны баҕарабыт!

Эрдэ иһитиннэрбиппит курдук, атырдьах ыйын 16-18 күннэригэр биһиги дойдубут Башкортостан республикатын киин куоратыгар Уфаҕа, 21-дэригэр диэри саастаахтарга көҥүл тустууга аан дойдуга биирдиилээн уонна хамаанданан бастыыр иһин күрэхтэһии ыытыллар.

Маннык улахан таһымнаах күрэхтэһиигэ биһиги биир дойдулаахпыт, Мэҥэ Хаҥалас улууһун ыччата, бу саас Иркутскайга ыытыллыбыт Россия эдэрдэргэ түһүлгэтин кыайыылааҕа, Р.М. Дмитриев аатынан Олимпийскай эрэл училищетын студена Станислав Свинобоев кыттыаҕа. Кини орто ыйааһыҥҥа – 70-ҥа диэри киилэҕэ тустуоҕа.

Уолбут күрэхтэһии иннинэ бэлэмнэниини хайдах баран иһэрин туһунан, кини тус тренерэ – Саха Республикатын үтүөлээх тренерэ Василий Петрович Уваров биһиэхэ бу курдук иһитиннэрэр:

Хамаанда састаабын бүтэһиктээхтик быһаарар инниттэн үөрэтэр-эрчийэр түмсүү кэмигэр хонтуруоллуур хапсыһыылар ыытылыннылар. Стас эбиэккэ диэри икки, эбиэтттэн киэһэ икки хапсыһыыны ыытта, итиэннэ сүрүн утарсааччыларын эрэллээхтик кыайталаата: Шехшобековы 10:0, Топшиноевы 6:1, Хатуевы 9:2, Балояны 7:1.

Бүгүн, атырдьах ыйын 11 күнүгэр, хамаанда сүрүн тренерэ Абдусалам Гадисов, Россия хамаандатын састаабыгар кимнээх киирбиттэрин биллэрдэ. Уолбут сыала-соруга, туох баарын кыаҕын толору туһанан туран тустуохтаах, эбэһээт, форматыгар киириэхтээх, биир да сөкүүндэ турбакка, көхтөөхтүк үлэлээн тустарга сорудахтанна.

14-с чыыһылаҕа хамаанда Уфа5а көтөн кэлэр. Сарсыныгар ыйааһын көрүүтэ, оҥоруута. Онтон атырдьах ыйын 16-17 күннэригэр тустар. Ыйааһына билигин дьарык иннинэ 72,5-73 киилэ. Онон ыйааһына үчүгэй, самочувстиета, настарыанньата үчүгэй. Бэлэмнэнии барыта этэҥҥэ баран иһэр. Станислав ситиһиилээхтик кыттарыгар баҕарабыт!

Оннук, биһиги бары бэйэбит уолбут, инники эрэлбит – Станислав Свинобоев Уфа көбүөрүгэр ситиһиилээхтик кыттарыгар баҕарабыт.

Сахата суох тустуу суох, тустуута суох саха суох!

PS: Уфатааҕы күрэхтэһиини Россия спортивнай тустууга федерациятын анал сайтыгар wrestrus.ru быһа көрүөххүтүн сөп.

Россия хамаандатын састааба:

57 кг – Рамазан Багавудинов (Дагестан)

61 кг – Федор Балтуев (Иркутскай)

65 кг – Шамиль Мамедов (Москва)

70 кг – Станислав Свинобоев (Саха сирэ)

74 кг – Идар Хатанов (Москва)

79 кг – Алик Бадтиев (Хотугу Осетия)

86 кг – Ислам Картоев (Ингушетия)

92 кг – Иван Кириллов (Кемерово)

97 кг – Сослан Джагаев (Хотугу Осетия)

125 кг – Андрей Бестаев (Москва).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *