Уолаттарбыт кимнээҕи кытта тустар буоллулар?

Көҥүл тустууга Россия чемпионатын бастакы күнүгэр күрэхтэһиини – 57, 86 уонна 92 киилэ кыттыылаахтара саҕалыыллар. Бырагыраама быһыытынан, бу ыйааһыннарга финалистар быһаарыллыахтаахтар. Чемпионнар уонна призердар нөҥүө күнүгэр биллиэхтэрэ.

Ол курдук, 57 киилэҕэ сэрэбиэйи 41 бөҕөс ааста, ол иһигэр аҕыһа бэйэбит уолаттарбыт. Манна, эрдэ иһитиннэрбиппит курдук, бастыҥ рейтиннээх, аан дойду икки төгүллээх чемпиона Завур Угуевы уонна Европа чемпиона Азамат Тускаевы араарбыттар. Ол аата, кинилэр аллараа уонна үөһээ бөлөхтөрү баһылыыллар.

Сэрэбиэй быһыытынан маҥнай, финал 16/1-гэр үөһэ бөлөххө Айаал Белолюбскай – Рамазан Абдурахмановы (ХМАО-Югра), Михаил Иванов – Начун Монгуһу (Тыва), Уйгулан Иванов – Ананда Дашиевы (Бурятия), оттон аллараа бөлөххө квалификацияҕа Алексей Копылов – Жаргал Баяндуевы (Бурятия), Федор Постников – Артур Чебодаевы (Красноярскай), Егор Вензель – Мурат Бороковы (Ставрополь), финал 16/1-гэр Дмитрий Илларионов – Абубакар Муталимовы (Дагестан), Петр Константинов – Мягмар Далаевы (Бурятия) кытта тустуохтара.

Азамат Тускаев бөлөҕөр биһиэннэриттэн А.Белолюбскай, М.Иванов, У.Иванов, оттон Завур Угуевка – Д.Илларионов, А.Копылов, П.Константинов, Ф.Постников, Е.Вензель түбэспиттэр.

Сэрэбиэйи көрөөт туох диэххэ сөбүй? Ханныгын да иһин уонна уопсайынан даҕаны туста кэлэн баран, киирсэн баран тэйиэхтээхтэр. Бастакы эргиири ааһыахтаахтар. Утарсааччылара барыта бэйэлэрин курдук бөҕөстөр. Чэ, ити этэргэ кэбэҕэс, ким күүстээҕин – көбүөр көрдөрүө.

86 киилэҕэ икки кыттааччылаахпытын, “хараҕа суох сэрэбиэй” хара бастакыттан утары көрүһүннэрбит: Никита Софронов – Алексей Ефимов. Дьиҥэ, уолаттарбыт атын дьон илиитин-атаҕын боруобалаан көрбүттэрэ эбитэ буоллар дии саныыбын. Хайалара кыайбыта сэрэйдэххэ, аныгыскы эргииргэ бу ыйааһын биир лидерэ Артур Найфоновка тахсыаҕа.

92 кг ыйааһыҥҥа соҕотох кыттааччыбыт, хамаанда хапытаана Ньургун Сергин – спорт үтүөлээх маастара Анзор Уришевы (Красноярскай-КБР) кытта тустар буолбут.

Чэ, бастакы күн сэрэбиэйин кылгастык билиһиннэрдэххэ итинник. Сэрэбиэй аата – сэрэбиэй. Аны сарсын сарсыарда бөҕөстөр бары ыйааһыннаныыны бараллар. Баҕар онно уларыйыы да тахсан хаалыан эмиэ сөп.

Бастакы эргиир кэнниттэн уолаттарбыт хайдах тустубуттарын сиһилии билиһиннэриэхпит. Биһиги сайтпытын кэтии сылдьыҥ.

Уолаттарбытыгар ситиһиилээх кыттыыны баҕарабыт!

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *