Улуу Пехлеваны кытта көрсүһүү

«Россия – Моя история» музей-комплекс биир сыллаах үлэтин бэлиэтээн Аһаҕас аан күннэрин тэрийдэ. Ол курдук, бырагыраама быһыытынан, республикабыт биллиилээх психолога Светлана Владимировна Федорова бэсиэдэтэ, биолог Раиса Егоровна Винокурова эмтээх оттору билиһиннэриитэ, педагогическай наука кандидата, ХИФУ доцена Галина Семеновна Попова – Санаайа этнопедагогикаҕа аналлаах бэсиэдэтэ, о.д.а. олус интэриэһинэй көрсүһүүлэр, тэрээһиннэр ыытылыннылар.

Ол курдук, Аһаҕас аан күнүгэр – саха норуотун номоххо киирбит киһитин кытта көрсүһүү биир сэҥээриини ылла. 1976 сыллаахха Монреальга (Канада) ыытыллыбыт сайыҥҥы Олимпийскай оонньуу көҥүл тустууга күрэхтэһиитин үрүҥ көмүс призера, Аан дойду кубогын уонна Европа чемпионатын иккис миэстэлээҕэ, Сэбиэскэй Сойуус уонна аан “дойду аччыгый чемпионатынан” ааттаммыт – Тбилиситээҕи норуоттар икки ардыларынааҕы турнир хас да төгүллээх чемпиона, ССРС спордун үтүөлээх маастара, Саха АССР үтүөлээх тренерэ, Дьокуускай куорат уонна Сунтаар улууһун бочуоттаах гражданина Александр Николаевич Иванову кытта көрсүһүү сүрдээх интэриэһинэй буолла.

Көрсүһүү кыттыылаахтара, Р.М. Дмитриев аатынан Олимпийскай эрэл училищетын иитиллээччилэрэ биллиилээх ыалдьыкка элбэх ыйытыылары биэрдилэр. Холобур, 1974 сыллаахха Тегераҥҥа ыытыллыбыт норуоттар икки ардыларынааҕы турнир дьоруойунан буолан, “Улуу Пехлеван” диэн ааты хайдах ылбытын; кини төрөппүт аҕатын; оҕо сааһын; республикаҕа тустуу билиҥҥи туругун туһунан ыйыталаһан – сиһилии хоруйдары ыллылар.

Көрсүһүү кэмигэр экраҥҥа тыктарыллан көрдөрүллүбүт Александр Николаевич спорка, чуолаан көҥүл тустууга олоҕун кэрэһилиир хаартыскалары биирдии-биирдии кэпсээн, быһааран биэрдэ. Олимпийскай эрэл училищетын иитиллээччилэригэр бэйэтин сүбэтин биэрдэ.

Туйаара ПАВЛОВА, «Россия – Моя история» музей-комплекс экскурсовода.

Добавить комментарий

Ваш адрес email не будет опубликован. Обязательные поля помечены *