Улуу киһиэхэ

Учууталым, ССРС, РСФСР, Саха АССР үтүөлээх тренерэ Дмитрий Петрович Коркин сырдык кэриэһигэр.

 

Балаҕан ыйа барахсан

Дьыл үтүө даҕаны кэмэ –

Этэллэрэ былыргыттан

“Күһүҥҥү киһи күлбүтүнэн”

Ону толору итэҕэтэн

Күммүт мичилийэ көрдө

Дьоҥҥо-сэргэҕэ үөрүүнү аҕалла.

Балаҕан ыйын күнүн сарыала

Көлүччэҕэ сөтүөлээтэҕинэ,

Түүҥҥү ый кэлтэгэй күлүгүн

Уу дьиримэр көрүннэҕинэ

Ийэ сиргэ үтүө киһи төрүүр эбит

Саханы ааттатыахтаах мындыр,

Өркөн өйдөөх оннук киһи

Балаҕан ыйын саҥатыгар

Кытаанахха төрөөбүтэ, күнү көрбүтэ

Миитэрэй диэн сүрэхтэммитэ.

Кыракый Баттах алааска

Уоллаах-кыыс тулаайах хаалбыттара

Балаҕан дьиэлэрэ өтөхсүйбүтэ

Үтүө санаалаах аймахтара

Балаайалаах Мэхээлэ кыра уолу

Көрөн-истэн улаатыннарбыттара,

Булуҥунан, Дьокуускайынан эргийэн,

Ленин куоратыгар үөрэнэ тиийбитэ –

Улуу нуучча тылын үөрэтэр

Учуутал буоларга уһуйуллан

Хапсаҕайтан бэриһиннэрбит

Күүһүн-кыаҕын туһанан,

Тустуук буоларга умсугуйан,

Хоту дойду хоһууннарын

Аан дойду арҕаһыгар,

Олимп хайатын чыпчаалыгар

Олохтоохтук таһаарар санаалаах

Чурапчы томторугар төннүбүтэ,

Бигэ тылын биэрбитэ,

“Дьон, норуот туһугар

Күүс кыайарынан

Өй-санаа тиийэринэн,

Бэлэммин бигэтик үлэлииргэ,

Айарга, тутарга!”

Саха сирин эдэр талааннара

Устар олох инники эрэллэрэ

Түмсүбүттэрэ Чурапчыга.

Тустуу анал оскуолатыгар

Эрчиллибиттэрэ Куоркуҥҥа

Өр күүттэрэ барбатахтара –

Өлөксөйдөөх, Слава

Сойууһу бастакынан кыайбыттара,

Өрөгөйдөөбүтэ Саха сирэ,

Тоҕус томтордоох Чурапчы.

Баар буолбуттара батыһааччылар

Шестактар, Морфуннар,

Үчүгээйдэр, Сэмэннэр,

Афоня, Сахаачча, Андрос

Аан дойдуга аатырбыттара

Арамаан, Илларион,

Бастаабыта Байбал,

Бастыҥ быраҕыылаахтар

Александрдаах, Баһылай

Аҥаардастыы айбардаабыттара,

Биир олоххо Олимпиада

Түөрт мэтээлин Куоркун уолаттара

Дойдубутугар аҕалбыттара,

Саха сирин ааттаппыттара

Миитэрэй Бөтүрүөбүс

Айымньылаах үлэтин күүһэ,

Бэриниилээх бигэ санаата,

Сүүс бырыһыан туолбута –

Аҕыйах ахсааннаах сахаттан

Олимпиада геройдара тахсыбыттара

Үйэлэргэ сүгүрүйүҥ Куоркуҥҥа,

Норуотун ааттаппыт Киһиэхэ!

 

Семен ОКОЕМОВ, көҥүл тустууга ССРС спордун маастара, аан дойдутааҕы категориялаах судьуйа, Саха Республикатын үөрэҕириитин туйгуна.

Дьокуускай, 2009.

 

Добавить комментарий

Ваш адрес email не будет опубликован. Обязательные поля помечены *