Улуу бөҕөскө сүгүрүйүү бэлиэтэ

Бүгүн кулун тутар 7 күнэ — саха спордугар бэлиэ күн. Сахаттан бастакы олимпийскай чемпион Роман Михайлович Дмитриев төрөөбүт күнэ. Баара эбитэ буоллар, кини бүгүн 72 сааһын бэлиэтиэ этэ. Ол да буоллар, саха норуота бэйэтин ньургун уолун умнубат.

Роман Дмитриев спорка баар бары улахан үрдэллэри ситиһиилээхтик дабайан, бэйэтин төрөөбүт дойдутун, бэйэтин норуотун аан бастакынан киэҥ эйгэҕэ дорҕоонноохтук ааттаппыта. Кини – ССРС, Европа, аан дойду, Олимпиада чемпиона, спорт үтүөлээх маастара итиэннэ үтүөлээх тренерэ.

Бу бэлиэ күҥҥэ республикабыт киин куоратыгар уонна Роман Михайлович төрөөбүт Эдьигээнигэр кэриэстэбил тэрээһиннэр ыытылыннылар.

Дьокуускайга, Ярославскай уулуссатыгар олоро сылдьыбыт дьиэтигэр өйдөбүнньүк дуоскаҕа уонна Комсомольскай болуоссакка пааматынньыгар – сибэкки дьөрбөтүн ууруу сиэрэ-туома ыытылынна. Роман Михайлович төһө да билигин биһиги ортобутугар суоҕун иһин, киниэхэ норуот таптала уҕараабат. Буолан ааспыт тэрээһиннэргэ дьон-сэргэ таптааллаах уолугар сүгүрүйэн, тымныыны-туманы аахсыбакка кэриэстээн, көхтөөхтүк ахтан –санаан ааста.

Ол курдук, Комсомольскай болуоссакка буолбут тэрээһиҥҥэ Саха Республикатын Конституционнай суутун бэрэссэдээтэлэ Александр Ким-Кимэн, Саха сирин физическэй култуураҕа уонна спорка миниистирэ Иннокентий Григорьев, олимпийскай чемпион, Ил Түмэн депутата Павел Пинигин, Дьокуускай куорат баһылыгын эбээһинэһин толорооччу Евгений Григорьев, Роман Михайлович төрөппүт кыыһа Марина Крылова кэриэстээн ахтан-санаан аастылар, пааматынньыкка сибэкки дьөрбөтүн уурдулар.

Кинилэр Роман Михайлович аҥардас күүстээх спортсмен, олимпиец эрэ буолбатаҕын, ону тэҥэ кэрэ киһитин, улахан таһымнаах специалиһын бэлиэтээтилэр. Итиэннэ инникитин даҕаны кини олоҕун үөрэтэн, кини туһунан элбэҕи билэн-көрөн – олоххо, спорка, үөрэххэ ситиһиилэнэ туралларыгар баҕардылар.

Ити курдук, бу тэрээһиҥҥэ республика спорка общественноһа, Дьокуускай куорат олохтоохторо, спорт бэтэрээннэрэ, спортсменнар, тренердэр, Роман Дмитриев талааныгар сүгүрүйээччилэр этэргэ дылы, күргүөмүнэн кэлэн көхтөөхтүк кытыннылар. Манан кинилэр бары биир санаалаахтарын, түмсүүлээхтэрин көрдөрдүлэр.

Роман Михайлович сырдык аата, өссө саҥа кирбиилэргэ, сырдыкка, кэрэҕэ сирдии, угуйа турарыгар баҕарабыт.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш адрес email не будет опубликован. Обязательные поля помечены *