Түөрэх ким туһатыгар түстэ?

ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XI турнир иккис күнүгэ – 61, 70, 79, 92, 125 кг ыйааһыннарга бүтэһик быһаарыылаах хапсыһыыларга кимнээх көрсөллөрө билиннэ.

Ол курдук финалларга көрсүөхтэрэ:

61 кг Тувшинтулга Тумэнбилег (Монголия) — Ахмеднаби Гварзатилов (Азербайджан). 70 кг Бат-Эрдэнэ Бямбадорж (Монголия) – Евгений Жербаев (Россия, Бурятия). 79 кг Кахабер Хубежты (Россия, Хотугу Осетия) – Джумбер Квелашвили (Грузия). 92 кг Анзор Уришев (Россия, Красноярскай) – Артур Найфонов (Россия, Хотугу Осетия). 125 кг Золбоо Нацагсурэн (Монголия) – Комейл Гасеми (Иран).

Бэйэбит бөҕөстөрбүтүттэн бүгүҥҥү күҥҥэ боруонса мэтээл иһин хас даҕаны уолбут кыттыаҕа. Ол курдук, 61 киилэҕэ Айтал Захаров, Андрей Бекренев, Семен Владимиров, Дьулусхан Тотонов, Владимир Андросов, Николай Иванов “уоскутар” бөлөххө күөн көрсүөхтэрэ. Кинилэр бастыҥнара үһүс бириистээх миэстэ иһин Айсен Потаповтыын уонна Ньургун Александровтыын тустуохтара. Онон, икки боруонса мэтээл баар диэххэ сөп.

70 киилэҕэ Албан Аввакумов “уоскутар” бөлөххө казах Айдын Тажигалины кытта киирсиэҕэ. Оттон 79 киилэҕэ Алексей Ефимов боруонса мэтэл иһин Азербайджан уонна Турция бөҕөстөрүн кыайыылааҕын кытта көрсүөҕэ. Итини тэҥэ Максим Толмачев 92 киилэҕэ үһүс миэстэ иһин Гурам Черткоевтыын (Хотугу Осетия) тустуоҕа.

Бырагыраама быһыытынан бүгүн, балаҕан ыйын 7 күнүгэр киэһэ 18:00 чаастан түһүлгэни үөрүүлээхтик аһыы, ол кэнниттэн 57, 65, 74, 86, 97 кг ыйааһыннаахтар кыһыл көмүс уонна боруонса мэтээл иһин хапсыһыылара ыытыллыаҕа.

Оттон атын ыйааһыннар киирсиилэрэ сарсын күнүс 11:00 чаастан саҕаланыахтара.

Добавить комментарий

Ваш адрес email не будет опубликован.