Түһүлгэ түөрэҕэ ким туһатыгар буолар?

Модун” спортивнай комплекска Бырааттыы Ноговицыннар бириистэригэр хапсаҕайга Саха сирин маастарын нуормата толоруулаах республикатааҕы XV турнир үгэннээн ыытылла турар. Турнирга 25 хамаандаттан 283 хапсаҕайдьыт кыттар.

Турнир үөрүүлээх аһыллыытыгар Бырааттыы Ноговицыннар улахан убайдара – көҥүл тустууга ССРС спордун маастара, Үөһээ Дьааҥы улууһун бочуоттаах гражданина, “Триумф” Спорка бэлэмнэнии киинин дириэктэрин солбуйааччы Михаил Васильевич Ноговицыны 65 сааһынан чиэстээһин буолла.

Үбүлүөйдээччини Саха Республикатын Спорка миниистирэ И.Ю. Григорьев, Үөһээ Дьааҥы улууһун баһылыга Г.И. Чириков, Үөһээ Дьааҥы улууһун хапсаҕайга федерациятын салайааччыта Г.Д. Томскай, СР көҥүл тустууга федерациятын толорооччу дириэктэрэ Н.Д. Николаев, Чурапчы улууһун бэрэстэбиитэлэ И.И. Дьячковскай уо.д.а. эҕэрдэлээтилэр, өйдөбүнньүк бэлэхтэрин туттардылар.

Михаил Васильевич Ноговицын: “Биһиги бирииспитигэр хапсаҕайга турнир кэнники сылларга “Модун” спортивнай комплекска ыытыллара үтүө үгэскэ кубулуйан, республикаҕа тарбахха баттанар улахан таһымнаах турнирга кубулуйда. Онуоха бу комплекс салайааччытынан үлэлии сылдьыбыт Иннокентий Юрьевич Григорьевка уонна төрөөбүт Үөһээ Дьааҥыбыт улууһун дьаһалтатыгар улахан махталбытын тиэрдэбит! Эдэр тустууктар үчүгэй тустууну көрдөрөн, этэргэ дылы, илии тутуурдаах, өттүк харалаах баралларыгар баҕарабын. Ким күүстээх – ол кыайдын!”

Турниры үөрүүлээхтик аһыыга эдэр хапсаҕайдьыт, элбэх республикатааҕы турнирдар кыайыылаахтара уонна призердара Никита Валеев СР Спорка миниистирэ И.Ю. Григорьев илиититтэн Саха Республикатын хапсаҕайга спордун маастарын туоһулуур бэлиэни уонна дастабырырыанньаны тутта.

Ноговицыннар хапсаҕайга түһүлгэлэригэр эппиппит курдук, 283 бөҕөс таҕыста. Ол курдук, 55 кг – 48, 62 кг – 75, 70 кг – 67, 80 кг – 51, 90 кг – 24 уонна 90-тан үөһэ кг – 18 кыттааччы күөн көрсө сылдьар. Түһүлгэҕэ – Рустам Прокопьев, Прокопий Петров, Роберт Сидоров, Дмитрий Акимов, Дмитрий Шадрин, Иннокентий Иннокентьев, Игорь Софронеев, Платон Саввинов, Александр Халыев, Увар Тимофеев, Юрий Старостин уо.д.а. күүстээх хапсаҕайдьыттар кытталлар.

Турнир кылаабынай судьуйата – көҥүл тустууга РФ, хапсаҕайга СР спортарын маастара Андрей Яковлев салайыытынан бүгүн, бары ыйааһыннарга үстүү эргиир ыытылынна. Күрэхтэһии сарсын сарсыарда 10 чаастан салгыы ыытыллар.

Эрдэ суруйбуппут курдук, түһүлгэ түмүктэниитэ 70-ҥа диэри кг уонна 70-тан үөһэ кг – муҥутуур кыайыылааҕы быһаарар хапсыһыылар тэриллиэхтэрэ. Кыайыылаахтарга сыаналаах бириистэр туттарыллыахтара. Ону тэҥэ “Түһүлгэ бастыҥ бөҕөһө”, “Үөһээ Дьааҥы улууһун бастыҥ бөҕөһө” уонна “Турнир бастыҥ судьуйата” диэн анал бириистэр оонньонуохтара.

Дьэ, түһүлгэ түөрэҕэ ким туһатыгар буолар?

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован.