Тютрин “уоскутар” бөлөххө, Лазарев саҕалыыр…

Киевкэ, Украина аатырбыт тустууктарын уонна тренердэрин ааттарынан көҥүл тустууга норуоттар икки ардыларынааҕы турнир бүгүн иккис күнэ. Бэҕэһээҥҥи күрэхтэһиигэ, саха тустууга кыһатын түөрт иитиллээччитэ кытынна.

Бастакынан көбүөргэ Николай Охлопков (65 кг) таҕыста. Кини квалификацияҕа олохтоохтор эрэллэрэ Василий Шуптарга 3:4 ахсаанынан сабырыйтаран иһэн, ыраастык хотторон кэбистэ.

Иккиһинэн сахалартан көбүөргэ Беларусь Республикатын аатын аан бастаан көмүскүүр Россия үс төгүллээх призера Арыйаан Тютрин (57 кг) таҕыста. Кини квалификацияҕа азербайджанец Афган Хашаловы кыайыыга дьулуурдааҕынан баһыйда (ахсааннара 2:1). Салгыы финал 8/1-гэр болгарин Наим Микяйы 7:4 ахсаанынан баһыйа тутта. Онтон финал чиэппэригэр эдэрдэргэ Азия чемпиона Гуламжон Абдуллаевтыын (Узбекистан) туһунна. Манна даҕаны бэрт үчүгэйдик туста сылдьан, хапсыһыы бүтэрэ олох аҕыйах сөкүүндэ хаалыар диэри 3:2 ахсаанынан кыайан иһэн, бэйэтэ сыыһа хамсанан кэбиһэн, 4 баалга тиэрэ баран түһэн, кыһыылаахтык хотторон кэбистэ.

Онон Арыйаан Тютрин бүгүн «уоскутар» бөлөххө киирэн Сергей Терзи – Тарас Маркович (иккиэн – Украина) пааратын кыайыылааҕын кытта тустуоҕа. Онно кыайдаҕына, турнир биир боруонса мэтээлин иһин узбек Махмуджон Шавкатовы кытта тустуон сөп. Онон ханныктык эмэтик эрэл баар.

Биир эрэнэр бөҕөспүт Ньургун Скрябин (65 кг) бастаан украинец Иван Билейчугу 5:4 ахсаанынан кыайан баран, салгыы күрэхтэһиигэ американец Джо Маккеннаҕа 3:10 ахсаанынан баһыйтаран кэбистэ.  Оттон эмиэ бу ыйааһыҥҥа иккис киһибит Андрей Бекренев – грузин Шмаги Тодуаны 3:0 хотто, аныгыскы эргииргэ азербайджанец Туран Байрамовка тулуспата (0:11).

Онон бастакы күн түмүгүнэн, 65 киилэҕэ уолаттарбытын хоппут бөҕөстөр салгыы тустууга финалга тахсыбатахтарынан, биһиэннэрэ көрөөччү буоларга күһэлиннилэр.

Аны бүгүн – 61, 70, 79, 92, 125 кг ыйааһыннаахтар күрэхтэһиини саҕалыыллар. Биһигиттэн саамай ыарахан ыйааһыҥҥа аан дойду Кубогын боруонса призера Айаал Лазарев тустуоҕа. Кини ыйааһыныгар 26 бөҕөс баар. Айаал бастакы утарсаачыта – немец Геннадий Гудинович. Уолбут бөлөҕөр өссө украинецтар Хоцяновскай, Картавый, венгр Лигети, беларус Песняк диэн кутталлаах бөҕөстөр бааллар.

Бүгүҥҥү финаллар:

57 кг Нодиржон Сафаров – Гуломжон Абдуллаев (иккиэн – Узбекистан)

65 кг Эрназар Ахматалиев (Кыргызстан) – Али Рахимзаде (Азербайджан)

74 кг Мохаммад Фирузпур (Иран) – Сонер Демирташ (Турция)

86 кг Ахмед Магамаев (Болгария) – Себастьян Жезиржански (Польша)

97 кг Валерий Андрейцев (Украина) – Сулейман Карадениз (Турция).

Бүгүн тустуу биһиги бириэмэбитинэн киэһээ 17:00 чаастан саҕаланар. Хапсыһыылары wrestlingua.com сайт киирэн, ютуб-канаалга көрүөххүтүн сөп.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *