Тютрин, Николаев, Сергин – финалга!

Кемерово куоракка көҥүл тустууга “Шахтерская слава” норуоттар икки ардыларынааҕы VI турнирга уолаттарбыт ситиһиилээхтик туста сылдьаллар. Бүгүн күрэхтэһии түмүктэнэр. Кылгастык, биир дойдулаахтарбыт хайдах тустубуттарын билиһиннэриэхпин баҕарабын.

57 кг финал: Арыйан Тютрин – Тамир Гармаев (Бурятия). Кинилэр кылгас кэм иһигэр бу үһүс сирэй көрсүүлэрэ. Былырыын, Д.П. Коркин аатынан турнирга бурят бөҕөһө кыайыыны ситиспитэ. Арыйан ону быйыл эмиэ ити турнирга көрсөн, хотторуутун боруостаабыта. Омос көрдөххө, Тютрин билигин үчүгэй тустар таһымыгар сылдьар. Онон уолбут кыайарыгар бүк эрэллээхпит.

Атын уолаттарбыт хайдах тустубуттарын билиһиннэрдэххэ, 57 киилэҕэ Арыйан Тютрин – А.Манчиһы (Сербия) 12:2, А.Копыловы 4:0, Н.Эрмекбаевы (Красноярскай), 13:3, О.Дамдиновы (Бурятия) 7:6 ахсааннарынан кыайталаабыта.

Тютрин финалга тахсан, Копыловка “тыынын уһатан биэрдэ” диэххэ сөп. Онон Алексей Копылов үһүс миэстэни былдьаһааччылар бөлөхтөрүгэр киирдэ. Санатан эттэххэ, бастакы эргииргэ кини көбүөр хаһаайына Р.Лазаревы 14:2 ахсаанынан баһыйа туппута. “Уоскутар” бөлөххө А.Копылов маҥнай А.Манчиһы (Сербия) кытта тустуоҕа. Онно кыайдаҕына Н.Эрмекбаевка тахсыаҕа.

61 кг ыйааһыҥҥа Ньургун Александров бастаан бурят Э.Будажанаевы 4:4 ахсааҥҥа, быраабыла быһыытынан кыайыыны ситиспитэ. Салгыы күрэхтэһиигэ кини Турцияҕа, Дагестаҥҥа ыытыллыбыт турнирдар кыайыылаахтара азербайджанец Галиб Алиевка сабырыйтаран кэбистэ (2:4). Алиев сэрэйиллибитин курдук финалга таҕыста. Ол аата, Александров өссө да салгыы тустар кыахтанна. Бастакы утарсааччыта – Х.Сальгадо (Эквадор). Онно хоттоҕуна, үһүс миэстэ иһин К.Амиртаевы (Кемерово) кытта көрсүөн сөп.

Румыния гражданствотын ылбыт Николай Охлопков тустарын күүппүппүт ыраатта. Докумуон түһэриллэн баран, сыл курдук кэтэһиннэрэн, дьэ оҥоһулунна. Николай маҥнай улахан опыттаах, И.Ярыгин турнирын кыайыылааҕа буола сылдьыбыт норуоттар икки ардыларынааҕы кылаастаах спорт маастара Рустам Ампры (С-Петербург) кытта көрсөн, 12:6 ахсаанынан эрэллээхтик кыайда. Ол эрээри, иккис эргииргэ бурят Ю.Гергеновка хотторон кэбистэ (2:8). Хата киһитэ салгыы ситиһиилээхтик тустан, биһиги бөҕөспүт суолун арыйан биэрдэ. Онон Охлопков “уоскутар” бөлөххө киирэн маҥнай А.Евглевскэйи (Кемерово) кытта көрсөр. Онно кыайдаҕына – А.Якименкоҕа (Красноярскай) тахсар.

Бу ыйааһыҥҥа кыттыбыт атын уолаттарбыт, Владивостоктан Артем Ефремов – казах Ж.Иристаевка, Георгий Кычкин – тувинец Э.Тюлюшка хоттортоон кэбистилэр.

65 киилэҕэ Россия чемпионатыгар бэһис буолбут Дьулустаан Булатов табыллыбата, Ч.Котчиҥҥа (Кемерово) хомолтолоохтук хоттордо (2:2).

70 кг ыйааһыҥҥа Тимур Николаев – В.Акбановы (Бурятия) уонна А.Ауганы (Литва) 10:0, К.Корнеевы (Кемерово) 3:1 ахсааннарынан хотон, финалга таҕыста. Онно кини утарсааччытынан устудьуоннарга аан дойду чемпиона буола сылдьыбыт Н.Хизриев (Красноярскай) буолуоҕа.

92 киилэҕэ республика чемпиона Ньургун Сергин сэргэх тустууну көрдөрдө. Кини маҥнай Р.Магомедсаидовы (Кемерово), онтон И.Чилаевы (Казахстан) кыайталаан, бүтэһик быһаарыылаах хапсыһыыга венгр Б.Тоту кытта көрсүөҕэ.

97 киилэҕэ Ион Болтуновпыт – опыттаах Д.Кулиштан (Кемерово) хотторуу хомолтотун биллэ.

Онон уолаттарбыт Кемерово көбүөрүгэр тахсыылаахтык туста сылдьаллар. Үс уолбут финалга таҕыста, өссө аахпыккыт курдук, Алексей Копылов, Ньургун Александров, Николай Охлопков үһүс миэстэ иһин тустуохтара.

Бүгүн турнир бырагыраама быһыытынан, күнүс 14:00 чаастан саҕаланар, маҥнай “уоскутар” бөлөх тустуулара, оттон 15:00 чаастан – финаллар. Көтүтүмэҥ. Уолаттарбытыгар ыалдьыахха!

Петр ПАВЛОВ.

One thought on “Тютрин, Николаев, Сергин – финалга!

  • 23 сентября, 2018 в 12:49 пп
    Permalink

    Уолаттар маладьыастар,ессе кыайыылары ба5арабыт .чччгэй сонуннары истиэхпит диэн эрэнэбин.
    Красноярскайтан И.Бочкарев.
    Семён Павловка махтал.

    Ответ

Добавить комментарий

Ваш адрес email не будет опубликован.