Тывалар бэркэ дьаһаммыттар! Оттон биһиги?

Тыва Республикатын спортивнай тустууга федерациятын тэрийиитинэн, тохсунньу 30 күнүгэр көҥүл тустууга икки олимпийскай ыйааһыҥҥа (57, 65 кг) биллиилээх бөҕөстөр кыттыылаах күрэхтэһии тэриллэр. Кыайыылаахтар эргиир систиэмэтинэн быһаарыллаллар.  

Кыттааччылар: 57 кг – Дондук-Оол Хуреш Оол, Кужугет Белек-Оол, Метке Тумэтэй, Чамзын Амир, Монгуш Начын, Седен Кежик, Чебодаев Артур (Красноярскай) уонна ахсыс киһинэн сотору буолуохтаах Тыва эдэрдэргэ күрэхтэһиитин кыайыылааҕа киирэн биэриэҕэ.

65 кг – Казырык Сайын, Сюрюн Омак, Монгуш Чаян, Тюлюш Эзир, Жендаев Руслан (Красноярскай), Салчак Хемчик-Оол.

Коронавирус дьаҥынан сибээстээн билигин тохсунньу, олунньу ыйдарга тустууга улахан күрэхтэһиилэр суохтарын тэҥэ. Үгэс быһыытынан сыл саҥата ыытыллар Иван Ярыгин аатынан норуоттар икки ардыларынааҕы Гран-при турнир ыам ыйыгар көһөрүллүннэ.

Маннык түгэҥҥэ олорон биэрбэккэ, балаһыанньаттан тахсыахха наада. Спортсменнар күрэхтэһиитэ суох сайдыбаттар. Тувиннар маладьыастар! Оттон биһиэхэ даҕаны итинник дьоҕус күрэхтэһии тэриллиэн сөп бөҕө буоллаҕа дии. Тустууга хамаандабыт тренердэрэ уонна бөҕөстөр бэйэлэрэ сөбүлэһиэхтэрэ, Спорка бэлэмнэнии киинэ саалатын туран биэриэ этэ дии саныыбын.

Онуоха бастатан туран, ити Дыгын оонньуутугар бэйэтинэн тылланан сүрүн бирииһи туруорбут Алексей Семенович Пинигин курдук үптээх-харчылаах, кыахтаах, үтүө санаалаах салайааччы баара буоллар. Күрэхтэһии буолан баран, бириистээх буолуохтаах. Син үс бастакы ыйааһыҥҥа тэҥ күүстээх састаабы туруоруохха сөп ини. Күрэхтэһии көрөөччүтэ суох эрээри, быһа көрдөрүллүөхтээх. Хайаан да “Саха” НВК эрэ диэн буолбатах.

Маны туһааннаах дьон туох дии саныыгыт?

Петр ПАВЛОВ.         

 

Добавить комментарий

Ваш адрес email не будет опубликован. Обязательные поля помечены *