Тыа дьонун спорка көҕүлээччилэри өйүөҕүҥ!

Тыа сиригэр нэһилиэктэргэ спорт үгүс көрүҥнэрин олохтоохторго көҕүлүүр энтуазист дьоннор бааллар.

Хоту, Дьааҥы улууһугар, Адыаччы нэһилиэгэр биир оннук үлэни ыытар киһинэн – ыал аҕата, эһээтэ Александр Николаевич Аммосов буолар. Мин Аммосовтар дьиэ кэргэттэрин ыаллыы олорор буолан, бииргэ сүүрэн-көтөн, оонньоон үчүгэйдик билэбин. Александрдаах аҕыс бииргэ төрөөбүттэр, аҕалара Николай Николаевич сопхуоска бары үлэтигэр үлэлээбитэ, ийэтэ Акулина Павловна дьоруой ийэ, элбэх оҕону атахтарыгар туруордахтара. Александр убайа Семен Горохов эдэригэр бу олохтон барбыта, кылгас эдэр сааһыгар спорка күүскэ дьарыктаммыта, уолаттары көҕүлээбитэ, бэйэтэ тустууга, мас тардыһыыга ыһыахтарга оройуон күрэхтэһиитин кыайыылааҕа, призера буолары ситиспитэ.

Онтон да буолуо, Александр оҕо, эдэр сааһыттан волейболга аҕатынаан оскуола площадкатыгар дуоһуйа оонньоон кэлэрэ.

Биһиэхэ биир улахан үтүөтүнэн, учууталбыт Колесов Семен Семенович буолар, кини Александры волейболга, хайыһарга үөрэппитэ. Онтон салгыы саахымат, дуобат оонньотон, нэһилиэк хамаандата оройуоҥҥа да, сопхуос күрэхтэһиитигэр да миэстэлэһэрэ. Кыайыы күнүгэр эстафетаҕа, үбүлүөйдээх ыһыахтарга күүстээх хамаанда ааты ылары ситиспитэ.

Салгыы 90-с сылларга өбүгэлэр оонньууларын тэрийиигэ үлэлэспитэ, оройуоҥҥа оҕолор ортолоругар маҥнайгы өбүгэлэр оонньууларын ыытан, кыттааччылар уонна олохтоохтор сэҥээриилэрин ылбыта.

Мин бэйэм нэһилиэккэ элбэҕи тэрийсибит буолан билэбин, бириистэри, наҕараадалары бэйэтэ булара. Бу кэлин сылларга Александр Николаевич Дьокуускайга кэлэн, бэйэтин үбүгэр бириистэри, мэтээллэри ылан, оройуон волейболга күрэхтэһиитин уонтан тахса хамаандата кыттыылаах, ситиһиилээхтик ыытта.

Бу 40-тэн тахса сыл спорка төрөөбүт нэһилиэгэр үлэтэ таах хаалбата, олохтоохтор маны барытын билэллэр, киниэхэ махтаналлар.

Маны таһынан бөһүөлэк үлэтэ, өрөмүөнэ эмиэ сылын аайы Александр Аммосово илиитин иһинэн ааһар. Хаалбыт, быраҕыллыбыт МТЗ трактордары саҥаттан өрөмүөннээн оҥорон, уонча тракторы дьоҥҥо биэрэн, нэһилиэктэр үлэ бөҕөнү ыыттылар, ол саҕана ити трактордар үлэлэрэ төһөлөөх көмөлөспүтүн билэҕит.

Александр Николаевич нэһилиэгин, оройуонун туһугар билигин бочуоттаах сынньалаҥҥа даҕаны олордор тэтимин ыһыктыбакка үлэлии-хамныы сылдьар. Маннык дьону биһиги республикабыт салалтата сыаналыырыгар баҕарабын, холобура, Александр Николаевич Аммосовка “Саха Республикатын Физическэй култуураҕа уонна спорка үтүөлээҕин” ааты биэрии саамай сөптөөх буолуо этэ.

Тыа сирин энтузиастарын, эрэбиллээх дьонун өйүөҕүҥ.

Дмитрий ГОРОХОВ, спорт бэтэрээнэ.

Добавить комментарий

Ваш адрес email не будет опубликован. Обязательные поля помечены *