Тустуу бүттэ, Тустуу салҕанар

Аҕыйах хонуктааҕыта Кемерово куоракка норуоттар икки ардыларынааҕы турнирга бөҕөстөрбүт 1 кыһыл көмүс, 2 үрүҥ көмүс уонна 1 боруонса мэтээли ылан, биир дойдулаахтарын үөртүлэр. Бу тустуу тула кэпсэтии ситэ уҕарыйа илигинэ, аны биһигини атын күрэхтэһии күүтэр.

Ол курдук, балаҕан ыйын 28-30 күннэригэр Македония Скопье куоратыгар көҥүл тустууга бэтэрээннэр аан дойду үрдүнэн биирдиилээн бастыыр иһин чемпионаттара ыытыллар. Саха сириттэн бу чемпионакка үс бөҕөс кыттара биллэр. Ол курдук, хапсаҕай маастара Петр Осипов (78 кг, 1967 сыллааҕы төрүөх), көҥүл тустуу уонна хапсаҕай маастара Сергей Слепцов (62 кг, 1967 Бүлүү-Таатта) уонна хапсаҕай маастара Вадим Данилов (70 кг, 1966, Уус Алдан). Бэтэрээн тустууктарбытыгар ситиһиини баҕарыаҕыҥ уонна сахалыы сиэринэн сэмээр сэргэх сонуну кэтэһиэҕиҥ. Бөҕөстөр үс күн устата саастарынан араарыллыбыт биэс бөлөххө барыта 30 кэмпилиэк мэтээл иһин күөн көрсүөхтэрэ.

Санатан эттэххэ, былырыын маннык күрэхтэһиигэ – Болгария Пловдив куоратыгар алта бөҕөспүт кыттыбыта. Василий Уйгуров (70 кг) “В” бөлөххө, Вадим Данилов (70 кг) “Д” бөлөххө уонна Виктор Черкашин (62 кг) “Е” бөлөххө – бириискэ тиксиигэ биир хардыынан тиийбэккэ, бэйэлэрин ыйааһыннарыгар бэһис миэстэлэргэ тиксибиттэрэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *