Тустуук Константин Местников туһунан

Константин Дмитриевич Местников 1945 сыллаахха олунньу 2 күнүгэр Уус Алдан оройуонун Курбуһах нэһилиэгин Дьаарын диэн ураты кэрэ, ытык сиргэ сэттэ оҕолоох Дмитрий Васильевич уонна Мария Александровна Местниковтарга төрдүс оҕонон күн сирин көрбүтэ. Ийэлээх аҕата колхуостаахтар этэ.

Куоста тыа сирин оҕото буоларынан, алталааҕыттан-сэттэлээҕиттэн от үлэтигэр оҕус сиэтэн, от охсон, мунньан, оччотооҕу тыа сирин үлэтигэр барытыгар кыттара. Курбуһах интэрнээт-оскуолатыгар үөрэммитэ. Оччолортон спорка сыстан барбыт. Хайыһар күрэхтэһиитигэр этэрбэстээх сүүрэн, оройуонугар бастаабыт. Тустуунан эмиэ оскуолаҕа үөрэнэ сылдьан дьарыктаммыта. Спорка уһуйбут маҥнайгы учуутала – Афанасий Нестерович Максимов. Аан бастаан тустуу көбүөрүгэр тахсыыта 1962 сыллаахха оройуон үөрэнээччилэрин күрэхтэһиитигэр буолбута.

Бороҕоҥҥо киирэн баран, общественнай тренер Семен Васильевич Макеев салалтатынан тустууга эрчиллибитэ. Аармыйаҕа барыан иннинэ 1963 сыллаахха Среднеленскэй оройуон хамаандатыгар киирэн, республикаҕа бастыыр иһин күрэхтэһиигэ Мэҥэ Хаҥалас киинигэр Майаҕа кыттан, чемпион аалай лиэнтэтин аан маҥнай кэппитэ. Мантан ыла Куоста тустуунан үлүһүйэн туран дьарыктаныыта саҕаламмыта.

Оскуола кэнниттэн Ийэ дойдутугар ытык иэһин төлөөн, үс сыл аармыйаҕа сулууспалаабыта. Сулууспалыы сылдьан дивизиятыгар үстэ чемпионнаабыта.

Аармыйа кэнниттэн киномеханик үөрэҕин, онтон Дьокуускайдааҕы педагогическай училище физкултуураҕа салаатын үөрэнэн бүтэрбитэ.

Кэлин РСФСР уонна Саха АССР үтүөлээх тренерэ Николай Николаевич Волков салалтатынан дьарыктаммыта. Ситиһиилэриттэн билиһиннэрдэххэ: Уус Алдан оройуонугар үс төгүл “Сыл бастыҥ спортсмена”, Н.Н. Тарскай аатынан Саха АССР уонна Дальнай Восток, Сибиир зонатын хас да төгүллээх чемпиона.

Республика сүрүн чемпионатыгар үстэ миэстэлэспитэ. Ол курдук, 1969 сыллаахха 57 киилэҕэ Алкивиад Иванов кэнниттэн иккис миэстэни ылбыта. Үһүс Алексей Атласов буолбута. Эһиилигэр финалга Семен Морфунову кыайан, Саха сирин чемпионунан буолбута. Оттон 1972 сыллаахха 62 кг ыйааһыҥҥа Николай Колосов кэнниттэн пьедестал иккис үктэлигэр тахсыбыта. Итиннэ үһүс бириистээх миэстэни Илья Григорьев ылбыта.

1968 сыллаахха Ленинград куоракка Иван Поддубнай аатынан Бүтүн Сойуустааҕы турнирга 57 кг ыйааһыҥҥа бастакы миэстэни ылан, көҥүл тустууга ССРС спордун маастарын нуорматын толорбута. 1969 сыллаахха Тбилиси куоракка норуоттар икки ардыларынааҕы турнирга кыттыбыта. Онно эдэр бөҕөс – Сойуус биир күүстээх бөҕөһө Д.Мушегяҥҥа уонна аан дойдуга биллибит иранец Абдулбагерга хоттортоон туораабыта. Итиннэ төһө да ситиһиилэммэтэр, улахан түһүлгэ тыынын билбитэ. 1969 сыллаахха профсоюзтар сайыҥҥы спартакиадаларыгар, 1970 сыллаахха Саха АССР юбилейдаах спартакиадатыгар, 1971-1972 сс. Дьокуускай куоракка ыытыллыбыт Бүтүн Сойуустааҕы турнирга кыайталаабыта. Онон Константин Местников төрөөбүт республикатыгар көҥүл тустуу сайдыытыгар бэйэтин кылаатын киллэрбитэ.

Наҕараадалара: ССРС көҥүл тустууга спордун маастара (1970 с.), “Спорка бэриниитин иһин” (2015 с.), “Саха сиригэр тустуу 60 сыллаах сайдыытыгар” (2016 с.), “Сэрии оҕото” өйдөбүнньүк (2019 с.)  бэлиэлэринэн, Ил Түмэн бочуотунай грамотатынан (2015 с.) наҕараадаламмыта. “Урожай” спортивнай общество бочуоттаах чилиэнэ (2015 с.), Саха Республикатын физическэй култуураҕа уонна спорка бэтэрээнэ (2015 с.).

Кэргэнинээн Евдокия Степановналыын 53 сыл бииргэ олорон үс кыыһы төрөппүттэрэ. Кыргыттарын үөрэхтээн, ыал оҥортообута, сиэннэрдээх, хос сиэннэрдээх.

Константин Дмитриевич Местников олоҕун бүтэһик күннэригэр диэри Уус Алдан улууһун Окоемовка бөһүөлэгэр олорон, бу дьыл атырдьах ыйын 31 күнүгэр ыарахан ыарыыттан күн сириттэн күрэннэ.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *