Тустууктарбыт мэтээлгэ тиксибэтилэр

Эрдэ иһитиннэрбиппит курдук, ааспыт өрөбүл күннэргэ Индия киин куоратыгар Нью-Делигэ көҥүл тустууга Азия чемпионата ыытыллан түмүктэннэ. Бу, сыл аайы тэриллэр улахан күрэхтэһиигэ саха тустууга кыһатын икки иитиллээччитэ күрэс былдьаста.

Уолаттарбыт кыттыыларын саас-сааһынан билиһиннэрдэххэ, Филиппины аатыттан аан бастаан сүрэхтэммит Егор Дмитриев (61 кг) сэрэбиэй быһыытынан бастаан Япония чемпиона Риута Сакакига очукуонан ыраастык хотторон кэбистэ. Салгыы күрэхтэһиигэ дьоппуон Мухаммад Икромовка сабырыйтарбыта, биһиэхэ соһуччу соҕус буолла. Тоҕо диэтэххэ, сэрэбиэйи көрөөт, уолбут дьоппуону батыһан үһүс бириистээх миэстэ иһин тустуо дии санаабыппыт туолбата.

Түмүккэ Сакаки бэйэтэ боруонса мэтээлгэ тигистэ. Оттон бу ыйааһыҥҥа чемпионунан иккис сылын кыргыз Улугбек Жолдосбеков буолла.

Ыарахан ыйааһыҥҥа Кыргызстан чемпиона Айаал Лазарев (125 кг) бастаан Тахар эль Зубаидины (Ирак) атахтаан түһэрэн баран, “накат” диэн албаска эргитэлээн, утарсааччытын болдьоҕун иннинэ очукуонан ыраастык кыайда. Иккис эргииргэ сэрэбиэй быһыытынан, Азия хас даҕаны төгүллээх чемпиона Парвиз Хадига (Иран) улахан утарсыыны оҥорбокко хотторуу хомолтотун биллэ.

Бу да балаһыанньаҕа биһиги боруонса мэтээлгэ сананар санаалаах этибит. Онтубут баара, салгыы күрэхтэһиигэ иранец – казах Юсуп Батырмурзаевка ыраастык хотторон, бэйэтин дьонун да, биһигини даҕаны улаханнык соһутта. Онон, биһиги бөҕөспүт Айаал Лазарев салгыы күрэхтэһэрин тохтоторго тиийдэ.

Бу ыйааһыҥҥа Юсуп Батырмурзаев кыахтаахтык бастаата. Кинини, чемпионат арыйыытынан ааттыахха сөп. Оттон Парвиз Хади үһүс миэстэни ылла.

Ыйааһыннарын бэрээдэгинэн Азия чемпионнарынан буоллулар: 57 кг – Рави Кумар (Индия), 61 кг – Улугбек Жолдосбеков (Кыргызстан), 65 кг – Такуто Отогуро (Япония), 70 кг – Ильяс Бекбулатов (Узбекистан), 74 кг – Данияр Кайсанов (Казахстан), 79 кг – Арсалан Будожапов (Кыргызстан), 86 кг – Шутаро Ямада (Япония), 92 кг – Мохаммад Эбрахими (Иран), 97 кг – Моджтаба Голейдж (Иран), 125 кг – Юсуп Батурмырзаев (Казахстан). Хамаанданан түмүккэ кыайыыны иранецтар ситистилэр. Иккис Индия, үһүс Казахстан хамаандалара буоллулар.

Аны, кулун тутар 27-29 күннэригэр Кыргызстан киин куоратыгар Бишкеккэ, Азия континенын Олимпиадаҕа сүүмэрдиир күрэхтэһиитэ ыытыллар. Олимпиадаҕа путевката суохтар онно мустан, күөн көрсүөхтэрэ. Биһиги бөҕөстөрбүт эмиэ кыттарга былааннаналлар.

Петр ПАВЛОВ.   

 

Добавить комментарий

Ваш адрес email не будет опубликован. Обязательные поля помечены *