Тустуукпут тоҕо хоттордо?

Бухарест (Румыния). 23-тэригэр диэри саастаахтарга көҥүл тустууга аан дойду иккис чемпионатыгар биһиги икки бөҕөспүтүттэн көбүөргэ бастакынан Македонияттан кыттар Владимир Егоров таҕыста. Санатан эттэххэ, кини 57 киилэҕэ бастакы эргииргэ соторутааҕыта Венгрияҕа ыытыллан түмүктэммит аан дойду чемпионатыгар бэһис миэстэлэммит кубинец Андреу Ортеганы кытта туһунна.

Бу хапсыһыыны эрдэттэн кэтэһэн, интернетынан быһа биэриигэ көрдүбүт. Ону хайдах көрбүппүн “Дьулурҕан” (dzulurgan.ru) сайтка суруйабын.

Владимир Егоров (Македония) – Андреу Ортега (Куба)

Бастакы мүнүүтэҕэ бөҕөстөр бэйэ-бэйэлэрин бэрэбиэркэлэһэн, хапсыһыы наҕыллык саҕаланна. Чочумча буолаат, биһиги уолбутугар көҕө суохтук тустаҕын диэн бастаан утаа тылынан сэрэтии биэрдилэр. Ол аата, отут сөкүүндэ иһигэр киирсиини сытыырхатан баал ылбатаҕына, анараа киһиэхэ баар бэриллэр. Оннук да буолла, тугу да оҥорботоҕун иһин, Егоровка сэрэтии, оттон Ортегаҕа биир баалы биэрдилэр. Онтон эр санаатын ылан, кубинец атахтаан охторон эбии икки баалы сурунна. Партерга үлэлии сатаабата. Салгыы туран эрэн тустууга биһиги уолбут хайдах эрэ үчүгэйдик бэлэмнээбэккэ киһитигэр түспүтүн, анараата эрийэ тардан умса бырахта – өссө икки баал! Итинэн үс мүнүүтэлээх маҥнайгы түһүмэх түмүктэннэ. Ахсаан 5:0 Ортега туһатыгар.

Иккис түһүмэххэ киирэн Егоров сытыытык туста сатаата, оттон кубинец кыайан иһэр киһи быһыытынан холку. Туораттан иһиттэххэ, Владимирга сүбэлээн сахалыы үөгүлээһиннэр иһиллэллэр. Биир түгэҥҥэ уолбут атахтаан баран, сатаан тиһэҕэр тиэрдибэтэ. Кубинец үчүгэйдик көмүскэнэр. Оттон Владимир иккистээн атахтаата гынан баран, кубинец эриллэн тахсан төттөрүтүн эбии икки баалы ылла. Итинэн хапсыһыы түмүктэннэ. Ахсаан 7:0, Ортега.

Салгыы күрэхтэһиигэ Ортега монгол Занданбуд Занабазары 5:2 кыайан баран, китаец Зоуга 4:6 ахсаанынан хотторон кэбистэ. Онон, баҕар кубинец финалга тахсар түгэнигэр, Владимир Егоров “уоскутар” бөлөххө киирэн тустуо диэбит бүк санаабыт туолбата. Санатан эттэххэ, Ортега былырыын маннык күрэхтэһиигэ бастаан турар.

Хапсыһыыны көрөн баран тугу этиэххэ сөбүй?

Владимир бу күһүҥҥүттэн Бундеслигаҕа кыттан хас да кыайыыны ситиспитэ. Онно кини хамаанда туһугар ыйааһынын уларыта сылдьан кыттыбыта, сороҕор 57, ардыгар 61 киилэҕэ. Омос көрдөххө, элбэх ыйааһыны үүрэр быһыылаах. Ол иһин, сэниэтэ суох. Бытаан. Уопсайынан, ыйааһын түһэрэн баран, сатаан чөлүгэр киирбэтэх диэн тойоннуохха сөп. Кэлин ватсаапка тустуу группатыгар кини бэйэтэ “сэттэ киилэни түһэринэн кыахпын былдьаттым, онон сатаан тустубатым” диэбит. Ханныгын да иһин, улахан тустуук быһыытынан сыллааҕы туох баар кыттыытын үчүгэйдик былаанныан, онно анаан ыйааһынын эрдэттэн оҥосто сылдьыан сөп этэ дии саныыбын. Эбэтэр, олох даҕаны 61 киилэҕэ көстөҕүнэ сатанар.

Биир маннык түгэн баар. Киниттэн биһиги бары маннык күрэхтэһиилэргэ кыайыыны эрэ ирдиибит. Оттон уолбут республикатыттан туох да өйөбүлэ суох. Төрөөбүт улууһа уонна тренердэрэ булан-талан күүс-көмө буола сатыыллар. Туох даҕаны бырагыраамаҕа да суох. Ол иһин, сатаан күрэхтэһиилэргэ кыттыбат. Аны туран, атыттар курдук маннык эппиэттээх күрэхтэһиигэ кыттарыгар, бэлэмнэнэригэр спарринг-партнера даҕаны суох. Биир тылынан, тустар баҕалаах бөҕөспүтүгэр болҕомто наада. Тренерэ Н.Н. Рожины кытта биирдэ көрсөн кэпсэтэ сылдьыбытым, кини онно Владимир Егоровы ылбытын, ол эрээри, үчүгэйдик тустарга үп-харчы наадатын, хантан оннук кыахтаах киһини дуу, тэрилтэни дуу булабын диэн муҥатыйар этэ.

Дьэ, итинник. Ардыгар киһи хомойор. Били нууччалыы эттэххэ, “свой среди чужих, чужой среди своих” диэбиккэ дылы. Онон Владимиры сэмэлээн ырытыаххытын иннинэ, бастатан туран, кини усулуобуйатын көрүн!

Бүгүҥҥү финаллар:

57 кг: Рави Кумар (Индия) — Тошихиро Хасегава (Япония)
65 кг: Али Рахимзадэ (Азербайджан) — Реи Хигучи (Япония)
70 кг: Таймураз Салказанов (Словакия) — Давид Баев (Россия)
79 кг: Ника Кенчадзе (Грузия) — Гаджи Набиев (Россия)
97 кг: Гиви Мачарашвили (Грузия) — Колин Мур (АХШ).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *