Тустууга сыһыаннаах кэрчик санаалар

Соторутааҕыта Россия чемпионатыгар кыттыбыт уолаттары мин оҕо эрдэхтэриттэн хайдах тусталларын кэтээн көрөбүн. Бу уолаттар бастакы тренердэрэ тустууларын хайдах туруорбуттарынан туста сылдьаллар. Копылов, Окороков, Константинов, Александров, Аксенов, Владимиров, Павлов, Власов, Николаев, Сергин албастара татыма, тэтимнэрэ бытаана уонна күүстэрэ тиийбэтэ харахха улаханнык быраҕыллар. Сүүмэрдэммит хамаанда тренердэрин үлэлэрин түмүгэ көстүбэтэ. Кадет тустар стилинэн тустан, уһун соннонорбут быдан ыраах эбит.

Кавказ уонна бүрээт бөҕөстөрүн курдук 6 мүнүүтэлээх, тэтимнээх тустууну тулуйар уол баара көстүбэтэ. Ыаллыы бүрээт уолаттара тэтимнээх, түргэн тустууга киириэхтэриттэн лаппа эбиллибиттэрэ көстөр. Биһиги дьоммут анньыһан, күрдьүһэн туста сатыыллар да, кыахтара тиийбэт. Магомедов, Шираев, Баев, Валиев, Жамалов уонна да атыттар хас күрэхтэһии аайы тустууларын хаачыстыбата тупсан, сытыырхайан иһэр.

Кэлин сылларга Чурапчытааҕы спорт сайдыытын киинэ көҥүл тустууга республика сүүмэрдэммит хамаандатыгар көдьүүстээҕин көрдөрбөтө. Бүтүн Россияҕа Чурапчыттан соҕотох бөҕөс кыттан, тутатына туораата. Бу киин Тарскай эрэ күрэҕэр түмүллэн хамаанда туруорар үгэстэннэ. Чурапчыларга Россия уонна Аан дойду дабааннаах аартыктарын дабайар туһунан өйдөбүл сүттэ.

Оҕо тустууга анал оскуолалара мэтээл уонна спорт маастарын ахсаанын ааҕыынан үлүһэйэллэр. Өссө, бэчээккэ «Бу ситиһии буолбатах дуо?» диэн статистика таһаараллар. Аныгы кэмҥэ анал оскуола иитиллээччилэрэ Россияҕа, Европаҕа уонна Аан дойдуга үрдүк көрдөрүүлэнэринэн сыаналаныахтаахтар. Ол Уһук Илин уокурукка, тупиковай Россияҕа миэстэлэһии үлэ түмүгүн көрдөрбөт. Аатырбыт Чурапчы тустууга оскуолата ааспыт үйэ 70-с сылларыгар спорт маастарын ахсаанын элбэтээри улахан спортан тэйбитин бары билэбит эбээт. Сылы быһа араас маастар нуормалаах турнирдары кэрийэн хаачыстыбаннай көрдөрүү быста мөлтөөбүтэ. Ити сылларга Союзка уолаттарга, ыччаттарга уонна улахан дьоҥҥо Чурапчыттан дьөрү биир да тустуук бастаабатаҕа.

Республика сүүмэрдэммит хамаандатын бас уонна сүрүн тренердэрэ тустуу спортивнай оскуолаларын, УОРу, институттары, Чурапчытааҕы киини уонна Спорт үрдүк маастарыстыбалаах оскуолатын тустууга иитиллээччилэрин дьарыктарын күннээҕи хонтуруолга ылан сүрүннүөхтэрин наада. Тустуу биир кэлим программанан сайдыахтаах.

Максим АФАНАСЬЕВ, Дьокуускай.

Добавить комментарий

Ваш адрес email не будет опубликован. Обязательные поля помечены *