“Тустууга бастайааннай турар музей баара эбитэ буоллар”


Строительнай” Атыы-эргиэн киинин Быыстапкалыыр саалатыгар ыытыллыбыт “Коркинныы олоруохха! Коркинныы айыахха!” республикатааҕы быыстапка биир кэрэхсэбиллээх экспозициятын Дьокуускайтан биллиилээх коллекционер Юрий Щукин туруорбута:

— Юрий, дьэ, бэртээхэй быыстапка буолла. Бу быыстапкаҕа эн тугунан кыттыбыккын билиһиннэр эрэ.

— Мин манна ыҥырыынан кэлбитим. Улуу тренербит Дмитрий Петрович Коркин үбүлүөйүгэр аналлаах быыстапка буоларын быһыытынан, тустуу туһунан муспут сэдэх мэтээллэрбин, наҕараада бэлиэлэрин аҕаллым. Коллекциям ахсаанын хаһан даҕаны ааҕааччым суох. Күннэтэ эбиллэ турар. Онон төһөтүн билбэппин, манна быыстапкаҕа туттарарбар даҕаны аахпатаҕым. Дьоннор сөҕөллөр, манныгы хантан булаҕын дииллэр. Барыта эргитэн-урбатан, көрдөһөн-ирдэһэн, этэргэ дылы, “ким көрдүүр – ол булар” диэн девизтээхпин.

Аны бу кэнники көмөлөһөр буоллулар. Холобур, биллиилээх бөҕөс Афанасий Иванович Заболоцкай миэхэ түөрт мэтээли бэлэхтээбитэ, онтон наһаа астыммытым, үөрбүтүм. Бу иннинэ ким даҕаны миэхэ итинник бэлэхтээбэт этэ. Бэйэтэ эккирэтэн, булан кэлэн, үлэбэр олордохпуна биэрбитэ. Онон киниэхэ махтанным.

— Маннык быыстапка аан бастаан тэрилиннэ. Дьоннор олох бэйэтэ музей курдук дииллэр. Оттон эн, элбэх быыстапкаларга кыттыбыт киһи хайдах сыаналыыгыный?

— Кырдьыгын эттэххэ, бу быыстапка салыннарда. Маннык буолуо дии санаабатаҕым. Татьяна Афанасьевна Гоголева улахан далааһыннаах, киэҥ көрүүлээх киһи эбит. Маннык тэрээһиннэр өссө буола туралларыгар баҕарабын. Тустууну таптааччыларга улахан үөрүүлээх дьыала. Мантан өссө салгыы сайдан бара турдар диэн баҕа санаалаахпын.
Бастакы нүөмэрдээх спорпут көрүҥэр – тустууга бастайааннай турар музей баара эбитэ буоллар. Биһиги туруордубут, онтон хомуйдубут, онон быыстапка түмүктэнэн хаалла. Туспа дьиэлээх-уоттаах, бастайааннай турар, спорду таптааччылар сыллата кэлэн көрөр дьиэлэрэ баара эбитэ буоллар.

Петр ПАВЛОВ.

Добавить комментарий

Ваш адрес email не будет опубликован.