Тустууга аналлаах саҥа научнай үлэ оҥоһуллан бэчээттэннэ

М.К. Аммосов аатынан Хотугулуу-Илиҥҥи федеральнай университет уонна физическэй култуура, спорт института – Российскай Федерация үрдүк үөрэххэ уонна наукаҕа министиэристибэтин кытта кыттыһан, «Биомеханические основы специальной физической подготовки борцов вольного стиля» диэн саҥа үөрэтэр пособиены оҥорон, бэчээттэтэн таһаардылар.

Бу пособие ааптардарынан: П.И. Кривошапкин, У.П. Кривошапкин, И.Ф. Иванов, Б.А. Подливаев, Н.С. Филиппов буоллулар.

Научнай үлэҕэ көҥүл тустуу көрүҥүнэн дьарыктанааччылар эт-хаан өттүнэн бэлэмнэниигэ эрчиллии биомеханическай төрүттэрин боппуруостара көрүллэллэр. Үрдүк кылаастаах бөҕөстөрү иитэн, бэлэмнээн таһаарыыга көлүөнэттэн көлүөнэҕэ үөрэтиллэн кэлбит тустуу биомеханическай төрүттэри киэҥник ырытыы оҥоһуллар.

Үөрэтэр пособие физическэй култуура уонна спорт специалистарыгар, үрдүк үөрэх кыһаларын преподавателлэригэр, тренердэргэ, спортсменнарга, физическэй култуура учууталларыгар, устудьуоннарга уонна аспираннарга ананар.

Бу үлэ бастакы сырыыга наһаа элбэҕэ суох экземплярынан бэчээттэнэн таҕыста. Онон учуонайдар, СР физическэй култуураҕа уонна спорка министиэристибэтэ, эбэтэр СР спортивнай тустууга федерацията наадыйдаҕына эбии төлөөн бэчээттэтиэхтэрин сөп, дииллэр.

Бу кинигэни тустуу тренердэрэ хайаан да ылан, үлэлэригэр туһаналларыгар баҕарабыт. Умнумаҥ, науката суох – спорт сайдыбат!

“Дьулурҕан”.     

Добавить комментарий

Ваш адрес email не будет опубликован. Обязательные поля помечены *