Тустууга Аан дойду чөмпүйүөнүн чиэстээтилэр


Якутия 24” балаҕан ыйын 7 күнүнээҕи биэриитигэр: “Саха тустууга Эдуард Григорьев 61 киилэҕэ Бразилия Гоянь куоратыгар устудьуоннар ортолоругар ыытыллыбыт Аан дойду чөмпүйэнээтигэр кыайыыны ситистэ!,”— диэн комментатор Николай Бэстиинэп үөрүүлээх сонуну иһитиннэрбитэ. Ити сонун биһиэхэ, чурапчыларга, Улуу тириэньэрбит Дмитрий Петрович Коркин төрөөбүтэ 90 сылынан дьоһун бэлэх быһыытынан буолла, ону тэҥэ физкултуура институутуттан аан маҥнайгынан Аан дойду чөмпүйүөнэ таҕыста! Онон икки бүк үөрүүлээх бэлиэ түгэн тосхойдо!

Эдуард бу түһүлгэҕэ чөмпүйүөн үрдүк аатын ылбытын таһынан норуоттар икки ардыларынааҕы кылаастаах успуорт маастарын нуорматын толордо. Бу ситиһиигэ улахан кыһамньытын, сыратын-сылбатын ууран туран дьарыктаабыт улууспут биир тарбахха баттанар тириэньэрин Данил Романович Неустроевы эмиэ итиитик-истиҥник эҕэрдэлиэҕиҥ!


Уолаттары, улахан ситиһиилэринэн, балаҕан ыйын 17 күнүгэр, улуус дьаһалтатын мунньахтыыр саалатыгар улуус баһылыга А.Т. Ноговицын эҕэрдэлээтэ. Ол кэнниттэн Д.П. Коркин аатынан ыспартыыбынай интэринээт-оскуолаҕа устудьуоннар уонна интэринээт иитиллээччилэрэ кыттыылаах улахан линейка тэрилиннэ. Манна Эдуард Григорьевы уонна Данил Неустроевы Чурапчы нэһилиэгин баһылыга С.А. Саргыдаев, интэринээт-оскуола дириэктэрэ Н.Н. Гуляев, институт ректора И.И. Готовцев, тустууга улуус сүүмэрдэммит хамаандатын старшай тириэньэрэ Кирилл Захаров эҕэрдэлээтилэр.


“Барҕа махтал истиҥник көрсүбүккүтүгэр, тус бэйэбэр улахан долгутуулаах күн үүннэ. Түгэнинэн туһанан, махтаныам этэ улууспут баһылыгар Андрей Тимофеевичка. Иннокентий Иннокентьевич этэн аһарбытын курдук, улахан үлэ барда. Тус көмөлөрүн оҥорбут успуонсардарбытыгар: Алексей Пинигиҥҥэ, Николай Дьячковскайга, Степан Анатольевичка эмиэ улаханнык махтанабын. Итини таһынан махтаныам этэ, Александр Андреевка уонна биллэн турар, тириэньэрбэр Данил Романовичка, миигин тустууга киллэрэн, үөрэтэн, маннык улахан таһымҥа таһаарбытыгар махталым муҥура суох”, — диэн Эдуард түмүккэ харда тылы эттэ.


Семен ЖЕНДРИНСКЭЙ, Чурапчы улууһун “Саҥа олох” хаһыат корреспондена.
Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *