Тустуубут бэлиэ түгэнэ: Дьокуускайга ССРС чемпионата

1985 сыллаахха, бэс ыйын 20-23 күннэригэр биһиги республикабыт киин куоратыгар – Дьокуускайга, чопчулаан эттэххэ, “Спартак” стадиоҥҥа көҥүл тустууга Сэбиэскэй Сойуус үрдүнэн бастыыр иһин XXXXI чемпионат ыытыллыбыта. Онно Сойуус республикаларыттан, Москва, Ленинград куораттартан уонна Саха сириттэн барыта 236 бөҕөс сүүмэрдэнэн, талыллан кэлэн кыттыбыта, ким күүстээҕин быһаарсыбыта.

Саха сирэ аан бастаан маннык улахан таһымнаах күрэхтэһиини чахчы кыайа-хото тутан үрдүк тэрээһиннээхтик ыыппыта. Ыалдьыттар сыаналаабыттарынан, чемпионат туох да омуннааһына суох, тустуу улахан бырааһынньыгын быһыытынан ыытыллыбыта. Бүтүн республика общественнай олоҕор үөрүү-көтүү, сэргэхсийии тахсыбыта. Олохтоохторго уонна тэрийээччилэргэ туһаайыллан сүдү махталлар этиллибиттэрэ. Кырдьык, бастыҥ бөҕөстөр ким күүстээҕин быһаарсар түһүлгэлэрэ өрө көтөҕүллүүлээхтик, туох даҕаны сыысхала суох барбыта. “Спартак” стадиоҥҥа түөрт күн устата 12 тыһыынча миэстэлээх трибуналар – тустууну ис сүрэхтэриттэн дьиҥнээхтик таптыыр дьонунан сырыы ахсын тобус-толору этилэр.

Улахан түһүлгэни Саха АССР Министрдэрин Сэбиэтин бэрэссэдээтэлин солбуйааччы, тэрийэр кэмитиэт салайааччыта В.И. Федоров, Саха сирин тустууга федерациятын бэрэссэдээтэлэ Ю.С. Коркин туйгуннук ыыппыттара бэлиэтэммитэ.

Дьокуускайдааҕы ССРС XXXXI чемпионатыгар Саха сириттэн 20 бөҕөс кыттыбыта. Кинилэртэн Василий Гоголев (48 кг) иккис төгүлүн кыһыл, Владимир Яковлев (48 кг) уонна Роман Цыпандин (52 кг) үрүҥ көмүс мэтээллэри ылары ситиспиттэрэ. Өссө, Украинскай ССР аатыттан кыттыбыт Амма ыччата Артур Константинов 62 кг ыйааһыннаахтарга үһүс бириистээх миэстэҕэ тахсыбыта.

Оттон чемпионат кыайыылаахтарынан буолбуттара: 48 кг – Василий Гоголев (Дьокуускай), 52 кг – Минатулла Даибов, 57 кг – Руслан Караев (иккиэн – Дагестантан), 62 кг – Виктор Алексеев (Красноярскай), 68 кг – Борис Будаев (Бурятия), 74 кг – кыһыл көмүс мэтээл оонньоммотоҕо, 82 кг – Александр Тамбовцев (Воронеж), 90 кг – Роберт Тибилов (Хотугу Осетия), 100 кг – Лери Хабелов, 130 кг – Давид Гобеджишвили (иккиэн – Грузияттан).

Бу чемпионат түмүгүнэн, ити сыл балаҕан ыйыгар Будапешт (Венгрия) куоракка ыытыллар аан дойду чемпионатыгар кыттар ССРС хамаандата талыллыбыта. Онно биһиги Василий Гоголевпыт пьедестал үһүс үктэлигэр тахсыбыта уонна “Чемпионат бастыҥ техникалаах бөҕөһө” анал бирииһинэн бэлиэтэммитэ. Итиннэ бастаабыт Валентин Йорданов, Сергей Белоглазов, Арсен Фадзаев, Марк Шульц, Лери Хабелов, Давид Гобеджишвили курдук олимпийскай чемпионнартан ураты биһиги биир дойдулаахпытын ойуччу тутан бэлиэтээбиттэрэ, кини чахчы элбэх киириилээх-тахсыылаах, чаҕылҕанныы быраҕыылаах, түргэн-тарҕан туттуулаах, кэрэ тустуулаах бөҕөс буоларын кэрэһилиир.

Ити 35 сыллааҕыта ССРС чемпионата Дьокуускайга ыытыллыыта, билигин санаатахха, элбэх ыра санааны үөскэттэҕэ, тустууга тапталы күүһүртэҕэ, сахалар тустуук омук буоларбытын биллэрдэҕэ, маннык улахан таһымнаах күрэхтэһиилэри тэрийэр кыахтаахпытын итэҕэттэҕэ. Дэлэҕэ, ити кэнниттэн “Азия оҕолоро” норуоттар икки ардыларынааҕы спортивнай оонньуулар, көҥүл тустууга, боксаҕа Россия чемпионаттара, АХШ, Турция, Монголия хамаандаларын кытта тустууга табаарыстыы көрсүһүүлэр, о.д.а. улахан таһымнаах спортивнай күрэхтэһиилэр үрдүк тэрээһиннээхтик ыытыллыахтара дуо?! Спорт саҥаттан саҥа сулустара үүнэн, иитиллэн тахсыбыттара. Онуоха 1985 сыллааҕы Сойуус чемпионата элбэх киһиэхэ үтүө санааны сахпыта саарбаҕа суох.

ССРС-1985 чемпионатыгар сахалартан кыттыбыттара:

48 кг: Василий Гоголев, Владимир Яковлев, Григорий Христофоров, Степан Сивцев, Никита Никифоров, Алексей Стручков, Егор Алексеев уонна Петр Христофоров, Александр Стрекаловскай (иккиэн – Киевтэн).

52 кг: Роман Цыпандин, Иннокентий Аянитов, Руслан Попов, Василий Алексеев, Егор Борисов, Алексей Диодоров (Москва), Яков Филиппов (Ленинград).

57 кг: Егор Старостин, Семен Петухов, Егор Санников, Валерий Керемясов, Анатолий Михайлов, Николай Яковлев (Москва).

62 кг: Артур Константинов (Киев), Петр Бурцев, Моисей Ноговицын.

68 кг: Борис Борисов.

Петр ПАВЛОВ.      

 

Добавить комментарий

Ваш адрес email не будет опубликован. Обязательные поля помечены *