Тустуубут бэлиэ түгэнэ: Алексей Ермолаев ССРС-ка чемпионаабыта 55 сыла

// Кини аата Саха сирин спорка историятыгар дьоһун миэстэни ылар.

Сахалартан эдэрдэргэ Советскай Союз бастакы чемпионунан буолбут, Чурапчы Кытаанаҕыттан төрүттээх Алексей Николаевич Ермолаев 1941 сыллаахха Дьокуускайга төрөөбүтэ. Оройуон киинин оскуолатыгар үөрэнэр кэмигэр Д.П. Коркин салайар секциятыгар сылдьан көҥүл тустуунан дьарыктаммыта. Салгыы Дьокуускайдааҕы педучилище физкультурнай отделениетыгар үөрэммитэ. Манна тренер Н.Н. Волков салалтатынан эрчиллибитэ.

Алексей Ермолаев республикатааҕы типографияҕа ретушер быһыытынан үлэлиир сылларыгар, коммунистическай үлэ ударнига этэ.

Күрэхтэһиигэ ситиһиилэрин туһунан билиһиннэрдэххэ, 1962 сыллаахха Саха сирин норуоттарын Спартакиадатыгар сэттэ кыайыылаах – бастакы миэстэҕэ тахсыбыта. Эһиилигэр Ленинград куоракка буолбут бастакы разрядтаах бөҕөстөр күрэхтэһиилэригэр бастаабыта. 1964 сыллаахха Дьокуускайга ыытыллыбыт РСФСР чемпионатыгар 57 киилэҕэ Петр Алексеев кэнниттэн иккис миэстэни ылан үрүҥ көмүс мэтээлинэн наҕараадаламмыта.

Оттон 1965 сыллаахха ыам ыйын 21-24 күннэригэр Белоруссия Гомель куоратыгар ыытыллыбыт ССРС эдэрдэргэ (22-гэр диэри саастаахтарга) күрэхтэһиитигэр финалга, кэлин олимпийскай чемпион буолбут дагестанец Загалав Абдулбековы 5:2 ахсаанынан сабырыйан чемпион бочуоттаах аатын ылбыта. Итиннэ Алексей бэйэтин ыйааһыныгар сүүрбэ кыттааччыттан – биэс утарсааччытын ыраастык кыайан, Советскай Союз эдэрдэргэ күрэхтэһиитин чемпионун бочуоттаах аатын сахалартан аан бастакынан  ылбыта.

Ити, Гомеллааҕы күрэхтэһиигэ атын ыйааһыннарга: 52 кг – Коральби Шомахов (Махачкала), 63 кг – Василий Казахов (Орджоникидзе) уо.д.а. кэлин улаханнык биллэ сылдьыбыт бөҕөстөр бастаабыттара.  

Бу сыл Нальчикка, “Спартак” общество Россиятааҕы түһүлгэтигэр тэҥнээҕин булбатаҕа.

1966 сыл киниэхэ үрдүк көрдөрүүлэри тосхойбута. Ол курдук, төрөөбүт Сахатын сирин 63 киилэҕэ чемпионунан буолбута, аан дойду аччыгый чемпионатынан аатырар Тбилиситээҕи норуоттар икки ардыларынааҕы турнирга призердаабыта, Венгрияҕа буолбут аан дойдутааҕы түһүлгэҕэ кыайыылааҕынан тахсыбыта. Итиэннэ сахалартан бастакынан ССРС спордун норуоттар икки ардыларынааҕы кылаастаах маастарын нуорматын толорбута. Маны таһынан, А.Н. Ермолаевка, спорка үрдүкү ситиһиилэрин иһин, тустууктартан бастакынан – Дьокуускай куорат Бочуоттаах гражданина үрдүк аат иҥэриллибитэ.

Сахалартан бастакынан ССРС эдэрдэргэ чемпиона буолан уонна норуоттар икки ардыларынааҕы кылаастаах маастар нуорматын толорон – Алексей Ермолаев Саха сирин спорка историятыгар чиэстээхтик киирбитэ.

Алексей Николаевич кэлин “Спартак” общество республикатааҕы салаатыгар инструкторынан, Дьокуускай бастакы нүөмэрдээх профтехучилищетын преподавателинэн, куорат суутугар народнай сэтээтэлинэн уонна тренеринэн үлэлээбитэ.

Алексей Николаевич 1991 сыллаахха биһиги кэккэбититтэн өлөн туораабыта.

Алексей Ермолаев ситиспит үрдүк көрдөрүүтэ эдэр ыччаты көҕүлээн, саха тустууктарын дьоһун кыайыыга сирдээбитэ диэн этиэх кэриҥнээхпит. Итиэннэ улахан түһүлгэлэргэ тахсар суолу бастакынан тэлээччилэрбитин, кыайыыга кынаттааччыларбытын хаһан даҕаны умнуо суохтаахпыт.

Петр ПАВЛОВ.

Иннокентий ВАСИЛЬЕВ хаартысканан открытката.

Добавить комментарий

Ваш адрес email не будет опубликован. Обязательные поля помечены *