Тулагылар тустууга онлайн-дьарык тэрийдилэр

В.П. Керемясов аатынан Дьокуускай куорат үс нүөмэрдээх тустууга аналлаах спортивнай оскуолатын тренерэ, хапсаҕайга Саха сирин спордун маастара Станислав Егорович Афанасьев төрөппүт уола, Тулагы филиалын көҥүл тустууга тренерэ Дмитрийдыын – тулагыларга уонна куорат 21 нүөмэрдээх оскуолатын оҕолоругар анаан уон күннээх онлайн-дьарык тэрийэн ыыттылар.

Ол быһыытынан, тустуук оҕолор дьиэлэригэр олорон, бэйэлэрин күннээҕи дьарыктарын видеоҕа уһулан ватсаабынан ыытан – туох, хайдах эрчиллибиттэрин отчуоттаан истилэр. Ону көрөн, тренердэр дьарыктаммыт оҕолорго барыларыгар бэйэлэрин тус Махтал суруктарын уонна маҕаһыынтан атыылаһан кыра кубоктары өйдөбүнньүк быһыытынан бэлэхтээтилэр.

Ити курдук, тренер Афанасьевтарга эрчиллиини бардылар: Айсен Жирков – Дальнай Восток уонна республика чемпиона, Виолетта Махарова – Тулагы тустуук оҕолоруттан Россия бастакы призера, Дьальнай Восток икки төгүллээх чемпиона, Каролина Махарова, Мичил Васильев (1-кы кылаас үөрэнээччитэ), Сулус Бурцев, Арылхан Борисов, Антон Семенов (бары тулагылар) уонна Ньургун Чоросов – Казахстан Республикатын чемпиона, Белоруссия күрэхтэһиитин уонна “Боотурдар оонньууларын” призера, Эдик Макаров, Дархан Осипов, Эрчим Захаров, Юра Винокуров – республика призера, Дальнай Восток турнирын чемпиона, Федя Степанов – “Боотурдар оонньууларын” призера, Авсентий Капитонов – “Боотурдар оонньууларын” чемпиона (бары Дьокуускай куорат 21 нүөмэрдээх орто оскуолатын үөрэнээччилэрэ).

Онон, тустуук оҕолор төһө да карантиҥҥа олордоллор, дьарыктарын тохтоппотулар. Ити кинилэр салгыы ситиһиилээхтик кытталларыгар улахан төһүү күүс буолуоҕар – эрэл улахан.

Бу курдук, Тулагы тренердэрэ аҥаардас саалаҕа эрчийиинэн эрэ муҥурдаммакка, дьарыктыыр оҕолорун кытта араас иитэр үлэни ыыталлар. Нэһилиэк, оскуола салалталарын кытта көрсүһүүлэр, бастыҥ спортсменнары чиэстээһин, бэйэлэрэ булан-талан Казахстанынан, Белоруссиянан күрэхтэһиилэр, бииргэ эрчиллиилэр манна тиһигин быспакка тэриллэриттэн киһи эрэ үөрэр.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *