“Туймаада Ыһыаҕа-2020”: Төрүт көрүҥнэргэ күрэхтэһиилэр тэриллиэхтэрэ

Дьокуускай куорат физическэй култуураҕа уонна спорка управлениетын көҕүлээһининэн бу өрөбүлгэ, бэс ыйын 21 күнүгэр – Улуу Кыайыы 75 сылыгар аналлаах Туймаада ыһыаҕын чэрчитинэн хабылыкка уонна тутум эргииригэр онлайн-күрэхтэһиилэр тэриллэллэр. Күрэхтэһии сүрүн соругунан республикабыт киин куоратыгар саха төрүт оонньууларын тарҕатыы уонна сайыннарыы буолар. Итиэннэ нэһилиэнньэ ортотугар чөл олоҕу түстээһин, Дьокуускай бастыҥ спортсменнарын талыы.

Күрэхтэһиилэр бэс ыйын 21 күнүгэр – Ыһыах күнүгэр Skype платоформаҕа ыытыллыахтара. Күнүс 13:00 чаастан – күрэхтэһии кыттыылаахтарыгар балаһыанньаны, быраабыланы билиһиннэрии. Ол кэнниттэн 14:00 чаастан – күрэхтэһии саҕаланар. Кылаабынай судьуйанан Манчаары аатынан Саха Республикатын спорт национальнай көрүҥнэригэр киин сүрүн специалистара үлэлиэхтэрэ. Ол курдук, хабылыкка – Надежда Николаевна Белолюбская, тутум эргииригэр – Иван Иванович Горохов.

Күрэхтэһиилэр – СР быраабылатыгар сөп түбэһиннэрэн ыытыллаллар. Кыттааччыларга иккилии мүнүүтэ бэриллэр. Хабылык күрэхтэһиитэ – кыргыттарга уонна уолаттарга, дьахталларга уонна эр дьоҥҥо итиэннэ аҕа саастаахтарга туспа бөлөхтөрүнэн тэриллэр. Оттон тутум эргииригэр уолаттар уонна эр дьон күрэс былдьаһыахтара. Күрэхтэһиигэ Дьокуускай куорат олохтоохторо эрэ буолбакка, республика талааннаахтара бары кытталлара көҥүллэнэр.

Кыайыылаахтар уонна иккис-үһүс миэстэлээхтэр – грамоталарынан, мэтээллэринэн уонна сыаналаах бириистэринэн наҕараадаланыахтара.

“Дьулурҕан”.    

Добавить комментарий

Ваш адрес email не будет опубликован. Обязательные поля помечены *