Туймаада түһүлгэтигэр 231 эдэр мадьыны күөн көрүстэ

Республикабыт киин куоратын 1-кы нүөмэрдээх спортивнай оскуолатын саалатыгар мас-рестлиҥҥэ уолаттарга Дьокуускай аһаҕас күрэхтэһиитэ ыытыллан түмүктэннэ. Бу күрэхтэһиини Дьокуускай куорат физическэй култуураҕа, спорка управлениета (начаалынньык К.С. Бурцев) уонна Саха сирин мас-рестлиҥҥэ федерацията (президент Г.А. Васильев) тэрийэн, бэлэмнээн ыыттылар.

Күрэхтэһиигэ куорат спортивнай оскуолаларын тэҥэ – Сунтаар, Нерюнгри, Томпо, Мэҥэ Хаҥалас, Уус Алдан, Таатта, Чурапчы, Амма, Хаҥалас эдэр мадьынылара, барыта 231 уол икки күн устата күөн көрүстэ. Түмүккэ ордук үчүгэй көрдөрүүнү Мэҥэ Хаҥалас уонна Уус Алдан эдэр мадьынылара ситистилэр. Ол курдук, Манчаары дойдутун оҕолоро – 5, Майаҕатта Бэрт Хара сыдьааннара – 3 чемпионнаахтар. Таатталар, сунтаардар даҕаны биирдиилээн ыйааһыннарга күүстээх тардыһааччылардаахтар эбит. Бу көрдөрөр, миэстэҕэ энтузиаст-тренердэр ситиһиилээх үлэлэрин.

Саха төрүт көрүҥэр оҕону кыра сааһыттан утумнаахтык дьарыктаан, араас таһымнаах күрэхтэһиилэри тэрийэн ыытыы – оҕолор эт-хаан, өй-санаа өттүнэн сайдарын таһынан, кэнэҕэс баҕардар Анатолий Баишев, Иван Белолюбскай, Николай Дьяконов курдук дойдуларын ааттатар албан ааттаах мадьынылар буола үүнэн-сайдан тахсалларыгар маннык тэрээһиннэр сүдү оруоллаахтар.

Бу улахан саастаах уолаттарга күрэхтэһии Саха Республикатын мас-рестлиҥҥэ федерациятын сыллааҕы календарьнай былааныгар киллэриллэн, рейтинг бааллаах күрэхтэһии — диир, күрэхтэһии кылаабынай судьуйата, ДЮСШ-7 дириэктэрэ Евгений Егорович Гоголев. — Барыта 37 хамаандаттан 231 оҕо кытынна. Күрэхтэһии тэрээһиннээхтик ыытыллыытыгар үлэлэспит судьуйаларга, Дьокуускай куорат физическэй култуураҕа уонна спорка управлениетыгар, В.Г. Черов дириэктэрдээх ДЮСШ-1 коллективыгар махтанабын. Кыттааччылар күрэхтэһэр таһымнара улааппыта харахха быраҕыллар.   

Кыайыылаахтар уонна иккис-үһүс миэстэлэри ылбыттар туһааннаах мэтээллэринэн, грамоталарынан уонна өйдөбүнньүк бириистэринэн наҕараадаланнылар. Күрэхтэһии түмүгүнэн тренердэр – талааннаах оҕолору бэлиэтии көрөн, этэргэ дылы, “харандааска ылан”, кинилэри кытта ситимнээхтик үлэлэһэн, чемпион буолалларыгар дьаныардаах эрчиллиини саҕалыылларыгар баҕарыаҕыҥ!

Күрэхтэһии түмүк көрдөрүүтэ

2001-2003 сс. төрөөбүттэргэ:

50 кг: 1. Николай Брызгалов (Мэҥэ Хаҥалас), 2. Илья Иванов (ДЮСШ-7), 3. Иван Атласов (Мэҥэ Хаҥалас).

55 кг: 1. Артур Попов (Мэҥэ Хаҥалас), 2. Герман Игнатьев (Сунтаар), 3. Александр Иванов (Таатта).

60 кг: 1. Эдуард Бояров (Мэҥэ Хаҥалас), 2. Аким Мосоркин (Таатта), 3. Эрхан Жирков (Уус Алдан).

65 кг: 1. Денис Жирков (“Модун”), 2. Дьулус Олесов, 3. Владимир Мохачевскай (иккиэн – Мэҥэ Хаҥалас).

70 кг: 1. Сергей Борисов (Чурапчы), 2. Константин Иванов (“Модун”), 3. Георгий Тимофеев (Сунтаар).

80 кг: 1. Гарри Сдвижков (Амма), 2. Александр Протопопов (ДЮСШ-7), 3. Борис Макаров (Таатта).

+80 кг: 1. Сергей Афонин (Усть Нера), 2. Эрхан Кузьмин (Амма), 3. Сарыал Антонов (“Модун”).

2004-2005 сс. төрөөбүттэргэ:

40 кг: 1. Слава Лебедев (Таатта, Чөркөөх), 2. Тимур Аммосов (Чурапчы), 3. Илья Иванов (ДЮСШ-7).

45 кг: 1. Ким Иванов (Мэҥэ Хаҥалас, Балыктаах), 2. Миша Кожин (ДЮСШ-7), 3. Влад Дмитриев (Таатта, Чөркөөх).

50 кг: 1. Стас Ховров (Уус Алдан), 2. Петя Кычкин (Мэҥэ Хаҥалас, Балыктаах), 3. Саша Тистяхов (Таатта).

55 кг: 1. Костя Сметанин (Мэҥэ Хаҥалас, Төхтүр), 2. Аюран Степанов (Мээндигэ), 3. Ваня Степанов (ДЮСШ-7).

60 кг: 1. Тимур Илларионов (Сунтаар), 2. Миша Андреев (Хаҥалас), 3. Ганя Павлов (Мэҥэ Хаҥалас).

65 кг: 1. Дамир Дугунов (Уус Алдан), 2. Алеша Собакин (Таатта, Чөркөөх), 3. Максим Спиридонов (Мэҥэ Хаҥалас).

70 кг: 1. Арылхан Сыроватскай (Уус Алдан), 2. Аким Пахомов (ДЮСШ-7), 3. Валентин Куречко (Нерюнгри).

+70 кг: 1. Айсен Рахлеев (Таатта, Уолба), 2. Ваня Павлов (ДЮСШ-7), 3. Саша Цыганков (Томпо).

“Дьулурҕан”.

Добавить комментарий

Ваш адрес email не будет опубликован. Обязательные поля помечены *