Тренерин аатын үйэтитээччи


Биһиги улуу тренербит Д.П. Коркин иитиллээччитэ — Саха сирин үтүөлээх тренерэ, СР физическэй култуураҕа үтүөлээх үлэһитэ, Россия физическэй култуураҕа уонна спорка туйгуна Афанасий Афанасьевич Лугинов аата республикаҕа киэҥник биллэр. Кини элбэх көбүөр күүстээх маастардарын иитэн таһаарбыта, 1999 сыллаахха Нерюнгрига үлэлии сылдьан Д.П. Коркин турнирын сөргүппүтэ, “Эрэл” спортивнай оскуола базатын тэрийбитэ. Оттон кэнники сылларга тренерин эрчийэр тэрилин – норуокка этиллэринэн, “Куоркун стенкатын” тарҕатааччынан биллэр.

А.А. Лугинов “Строительнай” Атыы-эргиэн киинин Быыстапкалыыр саалатыгар буолан ааспыт “Коркинныы олоруохха! Коркинныы айыахха!” республикатааҕы быыстапка биир көхтөөх кыттааччытынан буолбута.

— Мин бу быыстапкаҕа “Коркин дабаана” диэн тустууктар тренажердарынан кытынным, — диир Афанасий Афанасьевич. — Ону саҥардан, тупсаран, кыра да оҕо, улахан даҕаны киһи ыттан тахсар гына сакаастаан оҥоттордум. Маннык быыстапкаҕа мин төрдүс кыттыым. Бу иннинэ республикатааҕы үс спортивнай бэстибээлгэ барытыгар кыттыбытым. Манна наһаа үчүгэй быыстапка буолла. Дмитрий Петрович биһиги учууталбыт, тренербит 90 сылыгар аналлаах быыстапка. “Строительнай” рынок салайааччылара, көҥүл тустуу спордун маастардара көҕүлээн, саалаларын туран биэрэн, талааннаах тэрийээччи Татьяна Афанасьевна Гоголева ылсан, бу маннык улахан үчүгэй быыстапканы тэрийбиттэригэр махтал!

Быыстапка кэмигэр сүрдээх үчүгэй тэрээһиннэр ыытылыннылар. Урут көрбөтөх экспонаттарбын элбэҕи көрдүм. Инникитин бу быыстапка кэскиллээх буолуон наада. Бастайааннай да быыстапка оҥоруохха сөп. Дьокуускайга киһи элбэх, оҕо элбэх. Ол иһин манна син тэрийиэххэ сөп этэ.

Мин дьиҥинэ бэйэм элбэх экспонаттаахпын. Мэтээллэрдээхпин, значоктардаахпын, плакаттардаахпын… Өр сыл “Трудовые резервы” спортивнай уопсастыбаҕа үлэлээбитим. Элбэх иитиллээччилэрбит ити уопсастыба Россиятааҕы уонна Сойуустааҕы күрэхтэһиилэригэр ситиһиилээхтик кыттыбыттара, спорт маастардара буолбуттара. Кинилэри бэлэмнээһин иһин ылбыт мэтээллэрим миэхэ ордук күндүлэр. Роман Дмитриев бэлэхтээбит мэтээлэ эмиэ баар. Николай Колодко штангата, Федор Колосов үс саастаах уолбар бэлэхтээбит эриллибит тоһоҕото бааллар. Ону тэҥэ таһырдьа эмиэ коллекциялаахпын, былыргы сыарҕа, тэлиэгэ, араас, тыа ыалын туттар тэрилэ. Онон инникитин оҥостон маннык быыстапкаҕа кыттыахха сөп этэ. Биһиэнэ барыта ыксал-тиэтэл. Бараары-кэлээри сылдьар буолан, бэрт тиэтэлинэн кэлэн кытынным. Быыстапканы астынным.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *