Тохсунньу 30 күнүгэр – Дьокуускай тустууга аһаҕас чемпионата

Дьокуускай куорат физическэй култуураҕа уонна спорка управлениетын көҕүлээһининэн — РФ физическэй култуураҕа уонна спорка үтүөлээх үлэһитэ, Саха Республикатын үтүөлээх тренерэ, ССРС спордун маастара Валерий Петрович Керемясов кэриэһигэр көҥүл тустууга улахан дьоҥҥо Дьокуускай куорат аһаҕас чемпионата ыытыллар.

Бу күрэхтэһии – Саха сирин хамаандата Дальнай Восток федеральнай уокуругун чемпионатыгар бэлэмнэниитин чэрчитинэн ыытыллар итиэннэ олоҕун бүтүннүү тустууга анаабыт Валерий Петрович Керемясов үтүө аатын үйэтитии буолар.

Чемпионат тохсунньу 29-30 күннэригэр «Триумф» Спорка бэлэмнэнии киинигэр ыытыллар. Коронавирус дьанын салгыы тарҕаппат инниттэн, күрэхтэһии көрөөччүтэ суох тэриллэр.

Күрэхтэһиигэ – хас биирдии тэрийээччи, судьуйа, тренер уонна кыттааччы коронавирус бэрэбиэркэтин этэҥҥэ ааспытын туоһулуур сибиэһэй ыспыраапкалаах эрэ буоллаҕына – киллэриллэр.

Кылаабынай судьуйанан — республикатааҕы категориялаах судьуйа Станислав Афанасьев ананна.

Ыйааһын ахсын үс бириистээх миэстэҕэ тиксибит бөҕөстөр – мэтээллэринэн, грамоталарынан уонна өйдөбүнньүк бириистэринэн наҕараадаланыахтара.

Чемпионат хапсыһыыларын олохтоох телевидениеҕа «Мамонт» канаалга уонна «Саха» НКИХ ютуб-канаалыгар, оттон финаллары «Саха» НКИХ быһа көрдөрүөхтэрэ.

Санатан эттэххэ, иллэрээ сыл В.П. Керемясов аатынан Дьокуускай куорат аһаҕас чемпионатын кыайыылаахтарынан буолбуттара: 57 кг – Алексей Копылов, 61 кг – Егор Потапов, 65 кг – Ньургун Александров, 70 кг – Дьулустаан Булатов, 74 кг – Тимур Николаев, 79 кг – Иван Ефремов, 86 кг – Леонид Данилов, 92 кг – Софрон Софронов, 97 кг – Ньургун Сергин, 125 кг – Никита Хабаров.

Чемпионат бырагыраамата

Тохсунньу 29 күнэ, бээтинсэ

14:00-16:30 Мандатнай хамыыһыйа үлэтэ.

16:30-17:00 Хамаандалар бэрэстэбиитэллэрэ, тренердэр кыттыылаах судьуйалыыр коллегия сүбэ мунньаҕа.

17:00-18:00 Бары ыйааһыннарга (57, 61, 65, 70, 74, 79, 86, 92, 97, 125 кг) кыттааччылар сэрэбиэй тардыылара.

Тохсунньу 30 күнэ, субуота

08:00-08:30 Медицинскэй көрүү уонна бары ыйааһын кыттыылаахтарын ыйааһыннаныылара.

10:00-18:00 Бары ыйааһыннарга барыллааһын, финал аҥарынааҕы уонну «уоскутар» бөлөх тустуулара.

12:00-12:30 Чемпионаты үөрүүлээхтик аһыы.

19:00-21:00 Бүтэһик быһаарыылаах хапсыһыылар. Кыайыылаахтары наҕараадалааһын.

«Дьулурҕан».

Добавить комментарий

Ваш адрес email не будет опубликован. Обязательные поля помечены *