Тохсунньу томороон тымныытыгар “Триумфка” сытыы хапсыһыылар

Бэҕэһээ, тохсунньу 9 күнүгэр «Триумф» Спорка бэлэмнэнии киинин тустууга саалатыгар Дальнай Восток федеральнай уокуругун көҥүл тустууга чемпионатыгар бэлэмнэнии чэрчитинэн биирдиилээн ыйааһыннарынан бастыҥнары чопчулуур хапсыһыылар ыытылыннылар.

Коронавирус дьаҥынан сибээстээн, хапсыһыылар көрөөччүтэ суох ыытылыннылар. Онон түмүк боротокуолу көрөн, тустууну таптааччыларга кылгастык ырытыы оҥорорго быһаарынным.

Үөһээ ыйааһыннарга кыттааччылар аҕыйахтарынан, хапсыһыылар эргиир систиэмэтинэн ыытыллан баран, кыайыылаахтар хаачыстыбанан быһаарылыннылар.

Бастакы ыйааһыҥҥа Россия эдэрдэргэ күрэхтэһиитин үрүҥ көмөс призера, Горнай улууһун ыччата, маастарга кандидат Михаил Иванов (тренерэ А.К. Константинов) үчүгэй тустар таһымҥа сылдьарын көрдөрдө.

Бу ыйааһынҥҥа Айаал Белолюбскай, Федор Постников, Дьулустан Федотов, Валерий Андросов, Уйгулан Иванов курдук бөҕөстөр бириистээх миэстэҕэ киирбэтэхтэрэ, чахчы кытаанах хапсыһыылар буолбуттарын туоһулуур.

Иккис ыйааһыҥҥа былырыын баччаларга Ираҥҥа, Тахти аатынан норуоттар икки ардыларынааҕы турнирга бастаабыт Ньургун Александров (тренерэ Г.С. Игнатьев) бу да сырыыга кыайыы көтөллөннө. Кини бүтэһик быһаарыылаах тустууга Семен Владимировы 7:3 ахсаанынан баһыйа тутта.

Манна, дойдутугар ытык иэһин толорон кэлбит Быйаман Яковлев тустуутун сөргүтэн эрэрин бэлиэтиир тоҕоостоох. Быйаман үһүс миэстэ иһин киирсиигэ Амматааҕы СР норуоттарын спортивнай оонньууларын кыайыылааҕа Георгий Кычкины кыайыыта сыаналаныан сөп дии саныыбын.

Бу ыйааһыҥҥа, Петр Константинов хайдах тустубутуй диир буоллахха, кини Яков Павловы, Ньургун Терентьевы кыайталаан баран, Семен Владимировка 4:6 ахсаанынан сабырыйтарбыт.

Салгыы ыйааһыҥҥа састаабы көрөн баран, маастар Петр Павлов кыайа сыһар ини дии санаабытым. Онуоха кини иккис эргииргэ уруккуттан эриһэр киһитэ Айхан Антоновка 2:4 ахсаанынан хотторон кэбиспит. Оттон Антонов финалга, 2020 сыл түмүгүнэн Чурапчы улууһун бастыҥ спортсменынан ааттаммыт Константин Капрыновка (0:4) хотторбут. Манна даҕатан эттэххэ, Капрыновы Россия чемпиона, эдэр тренер Егор Пономарев эрчийэр.

70 киилэҕэ улахан дьон тустуутугар саҥа аат күөрэйэн таҕыста – Мэҥэ Хаҥаластан төрүттээх, бэйэтин саастыылаахтарыгар Дальнай Восток, Россия күрэхтэһиилэригэр ситиһиилэрдээх 19 саастаах маастарга кандидат Станислав Свинобоев. Кини Саха сирин үтүөлээх тренерэ Василий Уваров салалтатынан дьарыктанар. Станислав үс утарсааччытын очукуонан ыраастык кыайан баран, бүтэһик киирсиигэ спорт маастара Айсен Потаповы 4:1 ахсаанынан итэҕэтиилээхтик хотон, бу түһүлгэ арыйыытынан буолла.

74 кг ыйааһыҥҥа спорт маастара Тимур Николаев (тренердэрэ Н.Р. Крылов, В.Н. Кириллин) утарсааччыларыттан ойуччу турарын көрдөрдө.

Салгыы ыйааһыҥҥа РФ уонна СР үтүөлээх тренерэ Будимир Яковлевка эрчиллэр спорт маастара Герман Устинов кыахтаахтык бастаата. Финалга, бу иннинэ 65, 70 кг ыйааһыннарга кыттыбыт Револий Самсоновы баһыйа тутта.

86 киилэҕэ Амма ыччата, маастарга кандидат Алексей Ефимов (тренерэ Б.Г. Яковлев) түөрт хапсыһыыны ыытан, барытыгар толору үлэлээн, утарсааччыларын элбэх бааллынан (12:0, 6:1, 15:4, 14:3) баһыйа тутан бастаата.

92 киилэҕэ биэс бөҕөс кытынна. Кинилэр эргиир систиэмэтинэн туһуннулар. Онуоха спорт маастара Ньургун Сергин (тренерэ С.П. Сивцев) кими да киһилээбэтэ. Икки ыраас, икки очукуонан ыраас кыайыыны ситистэ.

Манна мин, билиҥҥи кэмнэ Саха сирин биир күүстээх хапсаҕайдьыта Александр Халыевы хайҕыахпын баҕарабын. Кини сүрүннээн хапсаҕайга киирсэрин таһынан, көҥүл тустуу күрэхтэһиилэригэр өрүү кыттара, ыарахан ыйааһыннаах бөҕөстөр бэлэмнэниилэригэр спарринг-партнер быһыытынан күүс-көмө, өйөбүл буолара кэрэхсэбиллээх.

97 кг ыйааһыҥҥа интэриэһинэй хапсыһыылар буоллулар. Биэс кыттааччы бэйэ-бэйэлэрин кытта сирэй көрүстүлэр. Онуоха киһи эрэ барыта, соторутааҕыта Россия эдэрдэргэ күрэхтэһиитигэр ситиһиилээхтик кыттыбыт, билигин Красноярскайга эрчиллэр Максим Толмачев бастыыра буолуо диэн билгэлээбитэ. Кини – А.Ароновы, Д.Иванову, К.Сивцеви кыайталаан баран, төрдүс киирсиитигэр Харысхан Николаевка ыраастык баран хаалан, турнирнай балаһыанньатын уустугурта. Маннык түгэҥҥэ, судьуйалар ааҕыыларынан норуоттар икки ардыларынааҕы кылаастаах спорт маастара Кузьма Сивцев (тренерэ С.П. Сивцев) хаачыстыбанан инники таҕыста.

Ыарахан ыйааһыҥҥа кэлиҥҥи кэмҥэ ситиһиилээхтик тустар 20 саастаах маастарга кандидат Никита Хабаров (тренердэрэ А.С. Некрасов, П.С. Иванов) Саха сиригэр баһылыыр-көһүлүү р оруолу ылан иһэрин көрдөрдө.

Түмүктээн эттэххэ, пандемия кэмигэр ноҕуруускаларын намтата сыһан баран, бөҕөстөр күһүҥҥүттэн ылсан, син балачча эрчиллиилээх, бэлэмнээх буоланнар үчүгэй хапсыһыылары ыыттылар диэххэ сөп. Боротокуолтан көрдөххө, Максим Толмачев, Ньургун Сергин, Герман Устинов, Даниил Иванов, Станислав Свинобоев, Петр Константинов араас албастары туттан элбэх очукуону сүүйдүлэр, ол аата, кимээһиннээх тустууну көрдөрдүлэр. Бу хапсыһыылар түмүктэринэн олунньу 11-13 күннэригэр Улан-Удэҕэ ыытыллыахтаах Дальнай Восток федеральнай уокуругун чемпионатыгар кыттар хамаанда састаабын тренердэр сүрүннээн бэлиэтии көрдүлэр диэххэ наада. Санатан эттэххэ, балаһыанньа быһыытынан, ити чемпионакка ситиһиилээхтик кыттыбыт тустууктар Россия чемпионатыгар кыттар быраабы ылаллар.

Сүүмэрдиир хапсыһыылар түмүк көрдөрүүлэрэ:

57 кг (17 кыттааччы): 1. Михаил Иванов – ОЭУ, 2. Петр Копылов – ХИФУ, 3. Егор Вензель, Айсиэн Винокуров – иккиэн ОЭУ, 5. Дмитрий Илларионов – ХИФУ, Сергей Егоров – ОЭУ.

61 кг (11): 1. Ньургун Александров, 2. Семен Владимиров – иккиэн ХИФУ, 3. Быйаман Яковлев – Чурапчы, Петр Константинов – ХИФУ, 5. Георгий Кычкин, Петр Гоголев – иккиэн ХИФУ.

65 кг (8): 1. Константин Капрынов – Чурапчы, 2. Айхан Антонов – Ньурба, 3. Кирилл Павлов – Сунтаар, Петр Павлов – ЦСП, 5. Дьулусхан Тотонов – ХИФУ, Петр Парников – ОЭУ.

70 кг (15): 1. Станислав Свинобоев – ОЭУ, 2. Айсен Потапов, 3. Албан Аввакумов – иккиэн ХИФУ, Айаал Алексеев – Амма, 5. Николай Захаров – ХИФУ, Василий Яковлев – ОЭУ.

74 кг (6): 1. Тимур Николаев – ЦСП, 2. Павел Яковлев – ХИФУ, 3. Михаил Сергеев – ОЭУ, 4. Андрей Дмитриев – Сунтаар.

79 кг (10): 1. Герман Устинов – ХИФУ, 2. Револий Самсонов – Сунтаар, 3. Алексей Захаров, Стив Попов – иккиэн Чурапчы, 5. Валерий Чемпосов – ЦСП, Денис Максимов – ХИФУ, Сунтаар.

86 кг (6): 1. Алексей Ефимов – ХИФУ, 2. Айсен Копырин – АГАТУ, 3. Петр Захаров – Чурапчы, ЦСП, 4. Николай Константинов – ХИФУ.

92 кг (5): 1. Ньургун Сергин – Мирнэй, 2. Александр Халыев – Дьокуускай, 3. Никита Софронов – ХИФУ, 4. Арсентий Николаев – АГАТУ.

97 кг (5): 1. Кузьма Сивцев – Нам, 2. Максим Толмачев – ХИФУ, 3. Андрей Аронов – АГАТУ, 4. Харысхан Николаев – ОЭУ.

125 кг (4): 1. Никита Хабаров – ОЭУ, 2. Эдуард Максимов – ОЭУ, 3. Иван Алексеев – Чурапчы, 4. Иван Охлопков – ОЭУ.

Петр ПАВЛОВ.        

Хаартыскаҕа: түһүлгэ саамай эдэр кыайыылааҕа Станислав Свинобоев тренерэ Василий Петрович Уваровтыын.

Добавить комментарий

Ваш адрес email не будет опубликован. Обязательные поля помечены *