Токио-2020: Япониятааҕы Олимпиада уратылара

От ыйын 23 күнүттэн атырдьах ыйын 7 күнүгэр диэри Япония киин куоратыгар XXXII сайыҥҥы Олимпийскай оонньуулар буолуохтара. Сүүһүнэн мөлүйүөнүнэн киһи аан дойду араас муннуктарыгар Күн Тахсар дойдутугар болҕомтолоро хатаныаҕа. Саха дьонун, биллэн турар, биир ыйытыы долгутар, биһиги хотугу дойдубутуттан бу киһи-аймах түөрт сылга биирдэ тэриллэр улахан таһымнаах аан дойдутааҕы түһүлгэтигэр ким кыттыай диэн.

Токиотааҕы Олимпиада уратылара

Быйылгы Олимпиадаҕа Аан дойдутааҕы олимпийскай комитет (МОК) хааччахтааһынынан, Россия сүүмэрдэммит хамаандата – Россия Олимпийскай комитетын аатыттан кыттар. Оттон гимн оннугар композитор Петр Чайковскай композицията оонньоноро быһаарыллыбыта.

Токиотааҕы оонньууларга каратэ, серфинг, бейсбол, софтбол, очуоска ыттыы, скейборд курдук спорт саҥа көрүҥнэрэ киирдилэр.

Оонньуулар кэмнэригэр 339 күрэхтэһии спорт 33 көрүҥэр ыытыллыа. Уопсайа 50 дьиссипилиинэ. Манна даҕатан эттэххэ, спорт сорох көрүҥнэригэр эбии дьиссипилиинэлэр киирдилэр. Холобур, баскетболга 3х3 көрүҥ эбилиннэ. Дзюдоҕа хамаанданан күрэхтэһиилэр киирдилэр. Харбааһыҥҥа эр дьоҥҥо 800, дьахталларга 1500 м дистанциялар эбилиннилэр.

Олимпиада талисманнара Мирайтова уонна Сомэйти – Кэскил уонна Үйэлээх диэн икки тылтан турар. Талисманы талыыга 2042 бырайыактан үс барылы талбыттара, олортон кыайыылааҕы Япония үөрэнээччилэрэ быһаарбыттара. Түмүккэ худуоһунньук Рио Танигучи айбыт персонаһа Олимпиада талисманынан талыллыбыта.

Мэтээллэр

Бу наҕараадалар уратыларынан, туһаттан тахсыбыт гаджеттартан, смартфоннартан уонна планшеттартан оҥоһуллубуттара буолар. Япония былааһа туһата суох электрониканы хомуйууну саҕалаабыта уонна бу 32 киилэ кыһыл көмүһү, 3,5 тонна үрүҥ көмүһү итиэннэ 2,2 тонна боруонсаны мунньубута.

Наҕараада 500 грамтан ордук ыйааһыннаах. Киэргэтиитэ Тахсар күннээх дойду үтүө үгэстэрин тутуһан оҥоһуллубут. Хас биирдии мэтээл сирэйигэр Олимпиада эмблемата уонна кыайыы таҥарата Ника ойууламмыт, кэтэх өртүгэр – «Токио-2020» диэн суруктаах.

Токио сахаларга уратыта

Сахаларга Токио спорт өртүгэр ураты куорат. 1964 сыллаахха үс саха аан бастаан сайыҥҥы Олимпийскай оонньуулары илэ харахтарынан көрөр чиэскэ тиксибиттэрэ. Кинилэр ааттара – Дмитрий Коркин, Иван Кычкин, Валерий Кочнев.

Кэлин үтүөлээх тренер буолбут Дмитрий Петрович Коркин Олимпиада хапсыһыыларын киинэҕэ устан, дойдутугар кэлэн устубутун көрөн, ырытан баран биир санааҕа кэлбитэ, сахалар аан дойду ааттаахтарын кытта тэҥҥэ тустар кыахтаахтар эбит диэн.

Дьэ, итинтэн ыла саха тустууктара Олимп чыпчаалын дабайыылара саҕаламмыта диэххэ сөп.

Токиотааҕы Олимпийскай оонньуулар өссө биир уратыларынан, ыарахан атлетикаҕа Владимир Голованов диэн, докумуонунан оччолорго Уус Алдан оройуонугар (Батамай) төрөөбүт киһи 90 киилэҕэ диэри ыйааһыҥҥа кыһыл көмүс мэтээли ылбыта буолар.

Айаал Лазарев – олимпиец

Тустуук Айаал Лазарев кэнники сылларга эриэ-дэхси көрдөрүүлэри ситистэ. Ол курдук, кини 125 кг ыйааһыҥҥа Москва Гран-при норуоттар икки ардыларынааҕы турнирыгар, Азия чемпионатыгар – иккис, Аан дойду биирдиилээн бастыыр иһин Кубогар, Олимпиадаҕа сүүмэрдиир Азиятааҕы уонна аан дойдутааҕы квалификационнай турнирдарга – үһүс миэстэлэри ылла.

Кини, аан дойдутааҕы квалификационнай турнирга тэҥ киирсиигэ индус Сумитка 2:2 ахсааҥҥа сабырыттаран кэбиспитэ. Индус түмүккэ иккис миэстэҕэ тахсан, олимпийскай путёвкаҕа тиксибитэ. Ол эрээри, кэлин биллибитинэн, Сумит көҥүллэммэт препараты туттубута биллэн, кини олимпийскай путёвката, ити турнирга үһүс миэстэҕэ тахсыбыт Айаал Лазаревка бэриллибитэ.

Онон биһиги бөҕөспүт Токио көбүөрүгэр тахсарга бэлэмнэнэр. Бу кэм устата Айаал Хотугу Осетияҕа анал эрчиллиини барда. Бөҕөспүтүгэр ситиһиилээх кыттыыны баҕарабыт.

От ыйын 23 күнүгэр бээтинсэҕэ, киэһэ 20:00 чаастан Киин телевидение бастакы канаалыгар Токиоҕа, XXXII сайыҥҥы Олимпийскай оонньуулары үөрүүлээхтик аһыы быһа биэриитин көрөөрү кэтэһэбит!

«Дьулурҕан». 

Добавить комментарий

Ваш адрес email не будет опубликован. Обязательные поля помечены *