Токио-2020: Ыарахан ыйааһыҥҥа сүүмэрдээһини кимнээх ааһыахтарай?

Сотору кэминэн буолуохтаах Олимпиада көҥүл тустууга сүүмэрдиир күрэхтэһиилэрин көрсө http://dzulurgan.ru сайтка балаһыанньаны билиһиннэриини салгыыбыт. Бу сырдатыы, саха тустууга кыһатын иитиллээччилэригэр сыһыаннаах. Биллэрин курдук, Олимпиада көҥүл тустууга күрэхтэһиитэ алта ыйааһыҥҥа ыытыллар эбит буоллаҕына, биһиги биир дойдулаахтарбытыттан үс бөҕөс квалификационнай турнирдарга кыттарга бэлэмнэнэр. Инники суруйууларга сайтпытыгар 57 уонна 65 кг ыйааһыннар балаһыанньаларын билиһиннэрэн турабыт, оттон бу сырыыга 125 диэри киилэ туругун кытта билсиҥ.

Эрдэ сылла эттэххэ, бу ыйааһыҥҥа кэнники кэмҥэ киһи кэтэспэтэх түгэннэрэ буоллулар. Биллэрин курдук, былырыын аан дойду чемпионатыгар Гено Петриашвили (Грузия) бастаабыта, Таха Акгуль (Турция) иккистээбитэ, Александр Хоцяновскай (Украина) уонна Хасанбой Рахимов (Узбекистан) үһүс, Дэнг Живей (Кытай) уонна Баджа Хутаба (Катар) бэһис буолбуттара уонна балаһыанньаҕа олоҕуран, олимпийскай путевкалары ылбыттара. Манна, туох да иэҕэ-чуоҕа суох, ылбыттара диир оруннаах. Тоҕо диэтэргит, кинилэр бэйэлэрин дойдуларыгар илин былдьаһар дьонноро суохтар да диэтэххэ сыыһа буолбата буолуо. Онон чопчу бу бөҕөстөр Олимпийскай оонньууларга кытталлара биллэр этэ.

Ол эрээри, соторутааҕыта биллибитинэн, Рахимов уонна Хутаба аан дойду чемпионатыгар бобуулаах препараты туһанан баран кыттыбыттара биллэн, салгыы күрэхтэһиилэртэн туоратылыннылар. Кинилэр оннуларыгар олимпийскай путевкалар Нур-Султаҥҥа сэттис-ахсыс миэстэлэри ылбыт Эгзон Шалаҕа (Косово) уонна Ядоллах Мохебига (Иран) бэрилиннилэр.

Оттон Оттаваҕа буолбут Панамерика континенын квалификационнай турнирыгар американец Ник Гвиаздовски уонна канадец Амар Дхеси ситиһиилээхтик тустан, Олимпиадаҕа кыттар быраабы ыллылар.

Аны – Азия, Европа, Африка уонна Океания континеннарын итиэннэ бүтэһик аан дойдутааҕы турнирдарга иккилии бастыҥ көрдөрүүлээх бөҕөстөр, ол аата, финалистар, барыта аҕыс киһи Олимпиадаҕа талыллыахтаах.

Дьэ, ити курдук, күүстээхтэри сиидэлээһин барбытын үрдүнэн, хаалбыт путевкалар иһин кимнээх, ханнык хамаандалар киирсиэхтэрин сөбүй диэн ыйытыыга хоруйдаатахха – Азербайджан (Джамалудин Магомедов), Германия (Ник Матюхин), Польша (Роберт Баран), Венгрия (Даниель Лигети), Россия (Балдан Цыжипов, Анзор Хизриев), Казахстан (Олег Болтин, Юсуп Батырмурзаев), Армения (Леван Берианидзе), Монголия (Доржханд Худербулга), Кыргызстан (Айаал Лазарев), Катар (Георгий Саканделидзе), Беларусь (Ибрагим Саидов), Индия (Сумит), Куба бааллар. Манна сыһыары тутан эттэххэ, Россия хамаандата бу эрэ ыйааһыҥҥа путевка ыла илик. Нур-Султаҥҥа аан дойду чемпионатыгар Алан Хугаев – Болтины кыайан баран, Хоцяновскайга хотторон туораабыта.

Маныаха, тустууну таптааччылар бастатан туран, Айаал Лазаревпыт Азия континенын квалификационнай турнирыгар ханнык ааттаах-суоллаах тустууктары кытта күөн көрсүөй диэн ыйыталлар. Онно хоруйдаатахха, бу континентан өссө Казахстан, Монголия, Катар, Индия, Корея, Япония хамаандалара олимпийскай лицензияны ыла иликтэр. Онон хатыһыылаах хапсыһыылар күүтүллэллэр. Санатан эттэххэ, континент күрэхтэһиитигэр баара-суоҕа икки эрэ путевка оонньонор. Онно тиксибэтэхтэр, бүтэһик 15-c, 16-с путевкалары Болгарияҕа буолуохтаах аан дойдутааҕы квалификационнай турнирга былдьаһыахтаахтар. Сүүмэрдиир квалификационнай турнирдар ханнык кэмҥэ көһөрүллүбүттэрин туһунан бу иннинээҕи суруйуубутугар (http://dzulurgan.ru) сырдатан турабыт.

Дьэ, онон, 125 киилэҕэ билиҥҥи туругунан Грузия, Турция, Украина, Кытай, Косово, Иран, АХШ, Канада хамаандалара олимпийскай путевкалаахтар.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *