Токио-2020: Тустууга олимпийскай путевканы бу күҥҥэ диэри хас дойду ылла?

Көҥүл тустууга Олимпиадаҕа бастыҥнары сүүмэрдиир бастакы күрэхтэһиинэн былырыын аан дойду чемпионата буолбута. Онно олимпийскай ыйааһыннарга (57, 65, 74, 86, 97, 125 кг) алта күүстээхтэр ахсааннарыгар киирбиттэр, бэйэлэрин дойдуларыгар Олимпиадаҕа кыттар быраабы аҕалбыттара.  

Бу иннинэ http://dzulurgan.ru сайтпытыгар “Токио-2020” диэн рубриканан Олимпиада сүүмэрдиир күрэхтэһиитигэр кыттыахтаах саха бөҕөстөрүн ыйааһыннарыгар балаһыанньа хайдаҕын билиһиннэрэн, үс ырытар-иһитиннэрэр суруйууну оҥорбуппут. Оттон бу сырыыга, олимпийскай путевканы хас дойду ылбытын сырдатыахха.

Былаан быһыытынан, Олимпиадаҕа сүүмэрдиир иккис түһүмэхтэр 2020 сыл саас буолуохтаахтара, аан дойду үрдүнэн өрө турбут коронавируһынан сибээстээн көһөрүлүннүлэр. Арай, Панамерика континенын күрэхтэһиитэ ыытылынна. Ону да, туох баар медицинскэй, санитарнай  ирдэбиллэри барытын тутуһан туран, көрөөччүтэ суох.

Биллэрин курдук, Олимпиада көҥүл тустууга күрэхтэһиитигэр ыйааһын ахсын 16-лыы бөҕөс кыттыахтаах. Итинтэн билиҥҥи туругунан 8-тыы киһи талылынна.

Ол эрээри, “сыа быыһыгар быччархай кыбыллыбытыгар дылы” диирбитигэр тиийэбит, Нур-Султаҥҥа аан дойду чемпионатыгар бэйэлэрин ыйааһыннарыгар үһүс миэстэлэммит Зелимхан Хаджиев (Франция), Хасанбой Рахимов (Узбекистан) уонна бэһис буолбут Баджа Хутаба (Катар) бобуулаах препараттары туһаммыттара биллэн, кинилэр Олимпиадаҕа кыттар бырааптара атын, чемпионакка кинилэр кэннилэриттэн миэстэлэри ылбыт бөҕөстөргө: поляк Камил Рыбицкайга (74 кг), косовец Эгзон Шалаҕа (125 кг) уонна иранец Ядоллах Мохебига (125 кг) бэрилиннэ.

Тустууга олимпийскай путевканы бу күҥҥэ хас дойду ылла? 26 дойду бөҕөстөрө ыллылар. Билиҥҥи туругунан, Россия уонна АХШ хамаандалара алта ыйааһынтан – биэстии путевкалаахтар. Россияннар арай 125 кг, оттон американецтар 65 киилэҕэ путевка ыла иликтэр.

Уруккуттан күүстээхтэринэн биллэр Азербайджан, Монголия, Украина хамаандалара биирдии эрэ путевкалаахтар. Хаалбыт икки күрэхтэһиигэ бу хамаандалар хастыы путевканы ылыахтара дии саныыгытый?

Аны Азия, Европа, Африка уонна Океания континеннарын күрэхтэһиилэригэр уонна бүтэһик, аан дойдутааҕы турнирга ыйааһын ахсын барыта аҕыстыы путевка оонньонор. Ити күрэхтэһиилэргэ путевканы финалистар, ол аата, бастакы-иккис миэстэҕэ тахсыбыттар ылаллар. Оттон, Олимпиадаҕа сүүмэрдиир күрэхтэһиилэр чопчу хаһан буолаллара билигин даҕаны биллибэккэ турар. Инньэ диибит даҕаны, Олимпиадабыт быйыл буолара саарбахтанна. Ол да буоллар, путевкалар хаттаан оонньоммот буолуохтаахтар. Олимпиада хаһан даҕаны буоллун, путевканы ылбыттар кыттыахтара.

Билиҥҥи туругунан олимпийскай путевкалаах хамаандалар:

Россия, 5 (57, 65, 74, 86, 97 кг)
АХШ, 5 (57, 74, 86, 97, 125 кг)
Казахстан, 4 (57, 65, 74k, 97 кг)
Куба, 3 (65, 74, 97 кг)
Индия, 3 (57, 65, 86 кг)
Иран, 3 (57, 86, 125 кг)
Канада, 2 (97, 125 кг)
Колумбия, 2 (57, 86 кг)
Грузия, 2 (97, 125 кг)
Япония, 2 (65, 74 кг)
Турция, 2 (57, 125 кг)
Аргентина, 1 (65 кг)
Азербайджан, 1 (97 кг)
Кытай, 1 (125 кг)
Венгрия, 1 (65 кг)
Италия, 1 (74 кг)
Косово, 1 (125 кг)
Монголия, 1 (65 кг)
Македония, 1 (97 кг)
Перу, 1 (86 кг)
Польша, 1 (74 кг)
Пуэрто Рико, 1 (74 кг)
Сан Марино, 1 (86 кг)
Сербия, 1 (57 кг)
Швейцария, 1 (86 кг)
Украина, 1 (125 кг).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *