Токио-2020: Тохсус күн – 7 мэтээли тосхойдо

Япония киин куоратыгар XXXII сайыҥҥы Олимпийскай оонньууларга кыайыылаах аатын ким ыларын быһаарсар тохсус күн күрэхтэһиитэ түмүктэннэ. Россия хамаандата – 1 кыһыл көмүс, 4 үрүҥ көмүс, 2 боруонса мэтээли ылары ситистэ. Биһиги сайтпытыгар Олимпиада хаамыытын билиһиннэриини салгыыбыт.

Бу күн Россия хамаандатыгар бастакынан мэтээли боксёрдар аҕаллылар. Ол курдук, Имам Хатаев уонна Андрей Замковой бэйэлэрин ыйааһыннарыгар үһүс миэстэ буолан, боруонса мэтээллэргэ тигистилэр.

Салгыы улахан теннискэ эр дьоҥҥо биирдиилээн бастыыр иһин күрэхтэһиигэ Карен Хачанов – Александр Зверевкэ (Германия) эрэ хотторон, иккис миэстэлэннэ.

Ити курдук, спортивнай гимнастика брусья көрүҥэр дьахталларга Анастасия Ильянкова уопсай түмүккэ иккис көрдөрүүлэннэ.

Оттон фехтованиеҕа эр дьоммут рапираҕа хамаанданан киирсиигэ быһаарыылаах көрсүһүүгэ французтарга хотторон, үрүҥ көмүс мэтээл хаһаайыннарынан буоллулар. Хамаанда састаабыгар Тимур Сафин, Владислав Мельников, Антон Бородачев, Кирилл Бородачев кытыннылар.

Дьэ онтон киэһэлик, улахан теннис микст көрүҥэр финалга, Россия икки паарата кыайыылаах аатын ким ыларын быһаарыста. Онуоха Анастасия Павлюченкова, Андрей Рублев паарата – Елена Веснина, Алан Карацев пааратын кыайан, кыһыл көмүс мэтээлинэн наҕараадаланна. Веснина, Карацев – үрүҥ көмүс мэтээлинэн бэлиэтэннилэр.

Ким төһө мэтээллэннэ?

(Атырдьах ыйын 1 күнүн түмүгүнэн)

Кытай – 24+14+13 = 51

АХШ – 20+23+16 = 59

Япония – 17+5+9 = 31

Австралия – 14+3+14 = 31

Россия – 12+19+13 = 44

Англия – 10+10+12 = 32

Франция – 5+10+6 = 21

Корея – 5+4+8 = 17

Италия – 4+8+15 = 27

Голландия – 4+7+6+17.

Бүгүҥҥү күн түмүгүнэн, кыһыл көмүс мэтээл ахсаанынан Австралия хамаандата Россия иннигэр түстэ.

Бүгүн гректии-римнии тустааччылар икки уонна дьахталлар тустууларыгар биир ыйааһыҥҥа финал аҥарыгар тахсарга диэри киирсиилэр буоллулар. Маныаха Россияттан Сергей Емелин (60 кг) уонна Сергей Семенов (130 кг) иккис хапсыһыыларыгар хотторон баран, утарсааччылара Куба уонна Грузия бөҕөстөрө финалга тахсыбыттарынан, сарсын «уоскутар» бөлөххө тустар буоллулар.

Манна даҕатан эттэххэ, ыарахан ыйааһыҥҥа 38 саастаах Михайн Лопес (Куба) финалга таҕыста. Кини сарсын кыайар түгэнигэр, гректии-римнии тустууга түөрт төгүллээх олимпийскай чемпион буолар. Эр дьоҥҥо ити уһулуччу көрдөрүү. Оттон дьахталларга японка Каори Ичо итинник ситиһиилээх.

Дьахталлар тустууларыгар олимпийскай чемпионка Наталья Воробьева (76 кг) иккис эргииргэ Кыргызстан спортсменыгар 0:12 ахсаанынан хотторон, күрэхтэһииттэн туораата.

«Дьулурҕан».  

Хаартыскаҕа: олимпийскай чемпионнар Анастасия Павлюченкова уонна Андрей Рублев.

Добавить комментарий

Ваш адрес email не будет опубликован. Обязательные поля помечены *