Токио-2020: Садуллаев – Снайдер. Ким кыайыай?

Япония киин куоратыгар XXXII сайыҥҥы Олимпийскай оонньуу спортивнай тустууга күрэхтэһиитэ бүгүн түмүктэнэр. Бырагыраама быһыытынан, эр дьоҥҥо көҥүл тустууга – икки, дьахталлар тустууларыгар – биир финал ыытыллар.

Ол иннинэ бастаан ити ыйааһыннарга «уоскутар» бөлөх тустуулара буолуо. Ол аата, финалга тахсыбыт дьоҥҥо хотторбуттар боруонса мэтээли иһин ким тустарын быһаарсыахтара.

Онон 65 киилэҕэ финалга тахсыбыт японец Такуто Отогуроҕа хотторбут монгол Тумур Очир-Тулга уонна Исмаил Мусукаев (Венгрия) тустуохтара. Хайалара кыайбыта үһүс бириистээх миэстэ иһин россиянин Гаджимурад Рашидовтыын күөн көрсүө.

Оттон иккис бөлөххө азербайджанец Гаджи Алиевка сабырыйтарбыт сенегалец Адама Диатта уонна казах Даулет Ниязбеков киирсиэхтэрэ. Ким кыайбыт – индус Бажранг Пунияны кытта «кыра финалга» көрсүөҕэ.

97 киилэҕэ «уоскутар» бөлөх тустуулара:

Шариф Шарифов (Азербайджан) – Элизбар Одикадзе (Грузия). Кыайыылаах боруонса мэтээли иһин киирсиигэ кубинец Салас Перескэ тахсыаҕа.

Стин (Канада) – Коньедо (Италия) пааратын кыайыылааҕа үһүс миэстэ иһин турок Сулейман Карадениһы кытта тустуоҕа.

Оттон финалларга көрсүөхтэрэ:

65 кг Такуто Отогуро (Япония) – Хаджи Алиев (Азербайджан).

97 кг Абдулрашид Садулаев (Россия) – Кайл Снайдер (АХШ)

50 кг Юи Сусаки (Япония) — Янань Сун (Кытай).

Дьэ, киһи дэбигис бу бөҕөс кыайыа диэн эппэт, тыҥааһыннаах, тэҥ, кэтэһиилээх хапсыһыылара биһигини күүтэллэр. Эһиги санааҕытыгар кимнээх кыайыахтарай? Холобур, Садулаев — Снайдер сирэй көрсүүлэрин ахсаана билиҥҥитэ — 1:1. Бу сырыыга хайалара кыайар. Мин Отогуроҕа уонна Садулаевка ыалдьабын.

Бырагыраама быһыытынан «уоскутар» бөлөх тустуулара Дьокуускай бириэмэтинэн 18:45 чааска саҕаланыахтара, оттон финаллар 19:30 чааска буолуохтара.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *