Токио-2020: Россия хамаандатыгар мэтээллэри кимнээх аҕаллылар?

Япония киин куоратыгар XXXII сайыҥҥы Олимпийскай оонньуулар финалларын үһүс күнэ түмүктэннэ. Бу күн Россия Олимпийскай комитетын хамаандата үс кыһыл көмүс, биир үрүҥ көмүс уонна биир боруонса мэтээллэри ылары ситистэ. Хамаандаҕа мэтээллэри кимнээх аҕаллылар?

Бу күн Россия хамаандатыгар кыһыл көмүс мэтээли бастакынан фехтованиеҕа София Позднякова аҕалла. Манна даҕатан эттэххэ, кини соторутааҕыта Горнайга “Манчаары оонньууларыгар” бочуоттаах ыалдьыт быһыытынан кэлэ сылдьыбыт Россия Олимпийскай комитетын президенэ, фехтованиеҕа түөрт төгүллээх олимпийскай чемпион Станислав Поздняков төрөппүт кыыһа. Кыайыылаах аатын ылар иһин бүтэһик быһаарыылаах киирсиигэ София – Токиотааҕы оонньуу үөрүүлээх аһыллыытыгар Россия олимпийскай хамаандатын былааҕын күөрэччи көтөхсөн киирбит Софья Великаяны 15:11 ахсаанынан кыайда.

Онон биһиги хамаандабытыгар Позднякова уонна Великая – кыһыл уонна үрүҥ көмүс мэтээллэри аҕаллылар.

Аны туран спортивнай гимнастикаҕа эр дьоҥҥо хамаандабыт – хамаанданан многоборьеҕа бастакы миэстэҕэ тахсан, бу күн иккис кыһыл көмүс мэтээли аҕаллылар. Хамаанда састаабыгар Денис Аблязин, Давид Белявскай, Никита Нагорнай, Артур Далалоян кытыннылар.

Бу күн Россия хамаандатыгар үһүс кыһыл көмүс мэтээли тхэквондист Максим Храмцов (80 кг) аҕалла. Кини бүтэһик киирсиигэ Иордания спортсменын баһыйда.

Бу иннинэ өссө, вышкаттан ууга ыстаныыга Виктор Минибаев уонна Александр Бондарь үһүс миэстэни ылан, боруонса мэтээллэринэн наҕараадаланнылар.

От ыйын 26 күнүнээҕи мэтээллэри ылыы түмүгэ:

  1. Япония – 8 кыһыл көмүс 2 үрүҥ көмүс 3 боруонса, барыта 13
  2. АХШ – 7+3+4 = 14
  3. Кытай – 6+5+7 = 18
  4. Россия – 4+5+3 = 12
  5. Англия – 3+3+1 = 7
  6. Корея – 3+0+4 = 7
  7. Австралия – 2+1+3 = 6
  8. Косово – 2+0+0 = 2
  9. Италия – 1+4+4 = 9
  10. Франция – 1+2+2 = 5.

Онон бүгүҥҥү күҥҥэ Россия олимпиецтара 4 кыһыл көмүс, 5 үрүҥ көмүс, 3 боруонса, барыта 12 мэтээллээх, барыллааһын ааҕыыга төрдүс миэстэҕэ таҕыстылар. Бу иннинэ Россия хамаандатыгар олимпийскай мэтээллэри кимнээх аҕалбыттарын биһиги сайтпыт http://dzulurgan.ru инники таһаарыыларыгар көрүҥ.

«Дьулурҕан».

Хаартыскаҕа: хаҥастан уҥа Софья Великая, София Позднякова (иккиэн Россия), Манон Брунье (Франция).

Телевизортан түһэрии. 

Добавить комментарий

Ваш адрес email не будет опубликован. Обязательные поля помечены *