Токио-2020: Россия хамаандатыгар алта мэтээл эбилиннэ

Япония киин куоратыгар XXXII сайыҥҥы Олимпийскай оонньуулар төрдүс финалларын күнэ түмүктэннэ. Россия хамаандата бу күн 3 кыһыл көмүс, 2 үрүҥ көмүс, 1 боруонса мэтээли ылары ситистэ.  

Бүгүн харбааччыларбыт үөртүлэр. Ол курдук, эр дьоҥҥо 100 миэтэрэҕэ көхсүгэ сытан харбааһыҥҥа Евгений Рылов бэйэтин киһитэ Климент Колесниковка сабырыттаран иһэн, олох биэтэккэ тиийэн бэрт аҕыйах дэһээтэйинэн баһыйан таҕыста. Онон Россия хамаандата бу дистанцияҕа кыһыл көмүс уонна үрүҥ көмүс мэтээллэннэ. Манна сыһыары тутан эттэххэ, дьон эрэ үксэ кыайыа диэн эрдэттэн сылыктаабыт киһилэрэ, аатырбыт Райан Мерфи (АХШ) үһүс миэстэнэн дуоһуйда.

Биһиги хамаандабытыгар үһүс олимпийскай мэтээли ытааччыларбыт аҕаллылар. Ол курдук, иккилии буолан (микст) пневматическай бэстилиэтинэн 10 м ытыыга Виталина Бацарашкина уонна Артем Черноусов финалга тиийэн китаецтарга хотторон кэбистилэр. Онон түмүккэ иккис буоллулар, ол аата – үрүҥ көмүс мэтээл! «Азия оҕолоро» норуоттар икки ардыларынааҕы спортивнай оонньуу 2012 сыллааҕы кыайыылааҕа Виталина Бацарашкина бу оонньууларга ити иккис мэтээлэ.

Онтон пневматическай бинтиэпкэнэн 10 м ытыыга Юлия Каримова уонна Сергей Каменскай састааптаах Россия хамаандата боруонса мэтээли ылары ситистэ.

Киэһэтин олох табылынныбыт. Маҥнай спортивнай гимнастикаҕа хамаанданан многоборьеҕа кыргыттарбыт (Ангелина Мельникова, Владислава Уразова, Лилия Ахаимова, Виктория Листунова) бастаатылар. Ол кэмҥэ аны тхэквондист Владислав Ларин (80-тан үөһэ кг) финалга Хотугу Македония спортсменын баһыйан, кыһыл көмүс мэтээли ылла.

От ыйын 27 күнүн түмүгүнэн мэтээллэри аахсыы туруга:

(таблицаҕа уон бастыҥ көрдөрүүлээх хамаанда)

1. Япония — 10 кыһыл көмүс 3 үрүҥ көмүс 5 боруонса = 18

2. АХШ — 9+7+8 = 24

3. Кытай – 9+5+7 =21

4. Россия – 7+7+4 =18

5. Англия – 4+5+3 = 12

6. Корея – 3+2+5 = 10

7. Австралия – 3+5+1 = 9

8. Канада – 2+3+3 = 8

9. Франция – 2+2+3 = 7

10. Косово – 2+0+0 = 2

Онон, бу күҥҥэ Россия олимпийскай хамаандата – 7 кыһыл көмүс, 7 үрүҥ көмүс уонна 4 боруонса мэтээллэннэ. Биһиги хамаандабыт хас биирдии күнүнэн кыттыытын түмүгүн туһунан http://dzulurgan.ru  сайтка киирэн көрүөххүтүн сөп.

«Дьулурҕан».   

 

Добавить комментарий

Ваш адрес email не будет опубликован. Обязательные поля помечены *