Токио-2020: Россия хамаандата билиҥҥитэ 7 мэтээллээх

Япония киин куоратыгар XXXII сайыҥҥы Олимпийскай оонньуулар финалларын иккис күнэ түмүктэннэ. Россия Олимпийскай комитетын (РОК) хамаандата бу күн биир кыһыл көмүс, икки үрүҥ көмүс уонна биир боруонса мэтээллэри ылары ситистэ. Онон бэҕэһээҥҥини кытта холбоон билиннитэ сэттэ мэтээллэннибит.

Ол курдук, спорт үтүөлээх маастара Виталина Бацарашкина пневматическай бэстилиэтинэн 10 м ытыыга олимпийскай рекорд олохтоон туран, кыайыыны ситистэ итиэннэ Россия хамаандатыгар бастакы кыһыл көмүс мэтээли аҕалла.

Оттон охчуттарбыт, хамаанданан күрэхтэһиигэ АХШ (6:0) уонна Германия (5:1) хамаандаларын кыайталаан баран, бүтэһик быһаарыылаах киирсиигэ Соҕуруу Корея хамаандатыгар хотторон кэбистилэр (0:6). Онон иккис миэстэҕэ тахсан, үрүҥ көмүс мэтээлинэн наҕараадаланнылар. Хамаанда састаабыгар Ксения Перова, Елена Осипова, Светлана Гомбоева кытыннылар.

Фехтованиеҕа дьахталлар финалларыгар Инна Дериглазова – Ли Кифергэ (АХШ) 13:15 ахсаанынан хотторон кэбистэ. Оттон тхэквондист Татьяна Минина (57 кг) финалга 18 саастаах американка Золотичка 17:21 ахсаанынан сабырыйтарда.

Ити курдук, фехтование рапира көрүҥэр Лариса Коробейникова үһүс миэстэ иһин киирсиигэ итальянка Элиза Вольпига бастаан утаа 1:5 ахсаанынан хотторон иһэн, кыайыыга дьулуурун көрдөрөн, түмүккэ 15:14 ахсаанынан кыайыылаҕынан таҕыста итиэннэ боруонса мэтээлинэн бэлиэтэннэ.

Россия олимпиецтарын мэтээллэрэ:

Кыһыл көмүс: Виталина Бацарашкина (ытыы).

Үрүҥ көмүс: Анастасия Галашина (ытыы), оҕунан ытыыга дьахталлар хамаандалара (Ксения Перова, Елена Осипова, Светлана Гомбоева), Инна Дериглазова (фехтование), Татьяна Минина (тхэквондо).

Боруонса: Михаил Артамонов (тхэквондо), Лариса Коробейникова (фехтование).

Олимпиада ытыыга күрэхтэһиитин көрө олорон, биһиги, сахалар даҕаны ити көрүҥнэргэ ситиһиилээхтик кыттыахпытын сөп ээ диэн санаа киирэр. Оҕунан ытыы республикабытыгар өссө син сайдыылаах эбит буоллаҕына, буулдьанан ытыыга улахан болҕомто ууруллара эбитэ буоллар. Этэргэ дылы, тииҥи харахха ытааччылар ханна бааргытый диэн иннинэ салалта уонна тренердэр спорт бу көрүҥүн сайыннарыыга улахан үлэни ыыталлара күүтүллэр.

От ыйын 25 күнүнээҕи түмүк:

Кытай – 6 кыһыл көмүс, 1 үрүҥ көмүс, 4 боруонса = 11 мэтээл

Япония – 5+1+0 = 6

АХШ – 4+2+4 = 10

Корея – 2+0+3 = 5

Россия – 1+4+2 = 7

Италия – 1+1+3 = 5

Австралия – 1+1+1 = 3

Франция – 1+1+1 = 3

Венгрия – 1+1+0 = 2

Тунис – 1+1+0 = 2.

«Дьулурҕан».

Добавить комментарий

Ваш адрес email не будет опубликован. Обязательные поля помечены *