Токио-2020: Рашидов уонна Садулаев финал аҥаарыгар таҕыстылар

Япония киин куоратыгар XXXII сайыҥҥы Олимпийскай оонньуу спортивнай тустууга күрэхтэһиитэ үгэннээн ыытылла турар. Бүгүн 65 уонна 97 киилэлээхтэр хапсыһыыларын саҕалаатылар. Итиэннэ 74 уонна 125 кг ыйааһыннаахтарга «уоскутар» бөлөх тустуулара ыытыллан, кимнээх олимпийскай мэтээл иһин киирсэллэрэ билиннэ.

Ол быһыытынан, финалларга көрсүөхтэрэ:

74 кг Заурбек Сидаков (Россия) — Магомедхабиб Кадимагомедов (Беларусь)

125 кг Гено Петриашвили (Грузия) — Гейбл Стивесон (АХШ).

Онтон боруонса мэтээл иһин:

74 кг Кайл Дэйк (АХШ) — Франк Чамизо (Италия)

74 кг Бекзод Абдурахманов (Узбекистан) — Данияр Кайсанов (Казахстан)

125 кг Живей Дэнг (Кытай) — Амирхоссейн Заре (Иран)

125 кг Таха Акгуль (Турция) — Лхагвагерел Мунхтур (Монголия).

Санатан эттэххэ, финаллар киэһэ биһиги бириэмэбитинэн 19:30 чаастан буолуохтара.

Дьахталлар тустууларыгар Бурятитяттан кыттыбыт Стальвира Оршуш (50 кг) – Мария Стадникка (Азербайджан) 7:11 ахсаанынан хотторон кэбистэ. Онон утарсааччытын салгыы кыттыытын кэтэһэр.

Оттон көҥүл тустууга Россия бөҕөстөрө күрэхтэһиини үчүгэйдик саҕалаатылар. Ол курдук, Гаджимурад Рашидов (65 кг) – армянин Теваняны 6:0, поляк Гаджиевы 6:2 ахсааннарынан хотто. Ол кэмҥэ Абдулрашид Садулаев (97 кг) – азербайджанец Шарифовы 5:0, грузин Одикадзены 10:0 ахсаанынан эрэллээхтик кыайда.

Биһиги бөҕөспүт Айаал Лазарев «уоскутар» бөлөххө олимпийскай чемпион Таха Акгуллууну туһунна. Итиэннэ 0:4 ахсаанынан хоттордо. Айаал бүтэһиккэ диэри туста, кимэ сатаата даҕаны, турок ньыгыл таас курдук, олох киллэттэрбэтэ, тугу да оҥотторбото. Бу, сонуну иһитиннэрэр суруйууга Лазарев кыттыытыгар түмүктээһин оҥорбоппут. Барытын сыныйан көрөн-истэн баран, тустаах специалистар туох дии саныылларын кэтэһэбит.

Финал аҥаарыгар көрсүөхтэрэ:

65 кг

Гаджимурад Рашидов (Россия) – Такуто Отогуро (Япония)

Гаджи Алиев (Азербайджан) – Баджранг Пуния (Индия).

97 кг

Абдулрашид Садулаев (Россия) – Рейнерис Салас (Куба)

Сулейман Карадениз (Турция) – Кайл Снайдер (АХШ).

50 кг

Мария Стадник (Азербайджан) – Юи Сусаки (Япония)

Сун Янань (Кытай) – Сара Хильдебранд (АХШ).

Финалга тахсар иһин киирсиилэр бүгүн Дьокуускай бириэмэтинэн 18:15 чаастан саҕаланыахтара.

«Дьулурҕан».

Добавить комментарий

Ваш адрес email не будет опубликован. Обязательные поля помечены *