Токио-2020: Олимпиец буолуон баҕалаах элбэх, оттон путевка аҕыйах!  

Аны сайын Япония киин куоратыгар буолуохтаах сайыҥҥы Олимпийскай оонньуу көҥүл тустууга күрэхтэһиитигэр сүүмэрдээһин туһунан суруйуубутун салгыыбыт. Бу сырыыга иккис ыйааһыны ылан көрүөххэ. Бу кэмҥэ диэри кимнээх, ханнык хамаандалар Олимпиадаҕа кыттар быраабы ыллылар? Итиэннэ хаалбыт путевка иһин кимнээх, хаһан киирсиэхтэрэй?  

Билэргит курдук, Олимпиадаҕа сүүмэрдиир бастакы күрэхтэһиинэн былырыын Нус-Султаҥҥа ыытыллыбыт аан дойду чемпионата буолбута. Онно 65 киилэҕэ туһааннааҕынан Гаджимурад Рашидов (Россия), Даулет Ниязбеков (Казахстан), Бажранг Пуния (Индия), Исмаил Мусукаев (Венгрия), Тумур-Очир Тулга (Монголия), Такуто Отогуро (Япония) эриэ-дэхси көрдөрүүлэнэн, бэйэлэрин дойдуларыгар Олимпиадаҕа кыттар быраабы аҕалбыттара.

Бу алта бөҕөстөн – биэһэ чопчу Токио көбүөрүгэр тахсар кыахтаах эбит буоллаҕына, аан дойду чемпиона Гаджимурад Рашидов олимпиец аатын ылара өссө быһаарылла илик. Тоҕо диэтэргит, Россия хамаандатыгар кинини тэҥэ өссө олимпийскай чемпион Сослан Рамонов уонна быйылгы дьылга киирэн баран, Красноярскайга И.Ярыгин турнирыгар уонна Европа чемпионатыгар ситиһиилээхтик кыттыбыт эдэр талааннаах тустуук Курбан Шираев буккуһуохтарын сөп. Өскөтүн, хамаанда кылаабынай тренерэ Дзамболат Тедеев, Рашидовы номнуо “олимпиец” оҥорон кэбиспэтэх буоллаҕына…

Соторутааҕыта, Канада – Оттава куоратыгар буолан ааспыт Панамерика континенын квалификационнай турнирыгар бастаабыт Алехандро Вальдес (Куба) уонна иккис буолбут Августин Дестрибас (Аргентина) Токиоҕа барар быраабы ыллылар. Оттон АХШ хамаандатыттан кыттыбыт Зейн Резерфорд соһуччу Дестрибаска ыраастык хотторон кэбиһэн, билиҥҥи кэмҥэ американецтар бу эрэ ыйааһыҥҥа олимпийскай путевкалара итэҕэс диэххэ сөп.

65 кг ыйааһыҥҥа билиҥҥи туругунан олимпийскай путевка иһин киирсэр састаап балачча күүстээх. Ол курдук, Турция (Селахатин Килисчалаян), Азербайджан (Хаджи Алиев), Иран (Мейсам Насири, Бахман Эхшанпур), Грузия (Владимир Хинчегашвили), Армения (Владимир Франгулян), Узбекистан (Ильяс Бекбулатов), АХШ (Янни Диакомихалис), Украина (Василий Шуптар, Гор Оганесян, Эрик Арушанян), Беларусь (Ньургун Скрябин), Болгария (Борислав Новачков), Молдова (Андрей Перепелица), Румыния (Георге Букур), Германия (Александр Семисоров)… бааллар. Бары даҕаны тэҥ баайыылаах бөҕөстөр.

Бу иннинээҕи суруйууга (http://dzulurgan.ru) бэлиэтээбиппит курдук, үөһээ ааттаммыт бөҕөстөр алта путевка эрэ иһин күөн көрсүөхтэрэ. Тоҕо диэтэргит, хаалбыт икки путевка Африка уонна Океания сүүмэрдиир күрэхтэһиитигэр быһаарыллыаҕа. Онон дьэ, ким эрэ Олимпиадаттан матан ытыыра буолуо. Олимпиец буолуон баҕалаах элбэх, оттон путевка аҕыйах!

Тустуу аан дойдутааҕы түмсүүтүн (UWW) быһаарыытынан, Олимпиадаҕа сүүмэрдиир квалификационнай турнирдар көһөрүлүннүлэр. Санатар буоллахха, Европа континенын турнира кулун тутар 19-22 күннэригэр Будапештка (Венгрия) ыытыллара былааннаммыта. Ону ыам ыйын ортотугар көһөрдүлэр. Оттон аан дойдутааҕы квалификационнай турнир Софияҕа (Болгария) бэс ыйын саҥатыгар буолара былааннанар.

65 киилэҕэ билиҥҥитэ олимпийскай путевкалаах хамаандалар: Россия, Казахстан, Индия, Венгрия, Япония, Монголия, Куба, Аргентина.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *