Токио-2020: Олимпиада футболга турнира хайдах буолуой?

Дьэ, өр кэтэһиллибит улахан таһымнаах күрэхтэһиибит саҕаланара чугаһаата. Чопчулаан эттэххэ, от ыйын 23 күнүгэр Токиоҕа XXXII сайыҥҥы Олимпийскай оонньуулары үөрүүлээхтик аһыы буолуоҕа. Ол эрээри, футбол (дьахталлар) уонна софтбол көрүҥнэригэр барыллааһын оонньуулар бүгүҥҥүттэн, от ыйын 21 күнүттэн саҕаланнылар.

Онтон, Олимпиада эр дьоҥҥо футболга турнира сарсыҥҥыттан Египет – Испания оонньуутунан саҕаланыа.

Санатан эттэххэ, футболга сүүмэрдээһини ааһан, барыта 16 хамаанда кыттар. Кинилэр сэрэбиэй быһыытынан түөрт бөлөххө араарыллан оонньууну саҕалыыллар.

А: Франция, Япония, Мексика, ЮАР.

В: Соҕуруу Корея, Новай Зеландия, Румыния, Гондурас.

С: Австралия, Аргентина, Испания, Египет.

Д: Кот Д, Ивуар, Бразилия, Германия, Саудовскай Аравия.

Оттон Россия хамаандата тоҕо суоҕуй диэтэххэ, россияннар сүүмэрдээһини сатаан ааспатахтара. Бөлөххө бүтэһик быһаарыылаах оонньууга австрияларга 2:3 ахсаанынан хотторон кэбиспиттэрэ.

Балаһыанньа быһыытынан, хамаандаҕа 23-гэр диэри саастаах футболистар киллэриллэллэр. Ол эрээри, састаапка биирдиилээн саастаах, идэтийэн оонньуур спортсменнар эмиэ бааллар. Ол курдук, спорт бу көрүҥэр аан дойдуга балайда биллэр-көстөр оонньооччулар: Дани Алвес, Ришарлисон (Бразилия), Марко Асенсио, Дани Ольмо, Педри (Испания), Гильермо Очоа (Мексика), уо.д.а. кыттыахтара.

Эр дьоҥҥо Олимпиада футбола от ыйын 22 күнүттэн атырдьах ыйын 7 күнүгэр диэри ыытыллар. Омос көрдөххө, састааба күүстээҕинэн Испания хамаандата ордук курдук. Ол эрэн, үгэс быһыытынан күүстээх испанецтары тэҥэ – Франция, Мексика, Аргентина, Бразилия, Германия хамаандалара бириистээх миэстэ иһин киирсэр буолуохтаахтар. Эһиги санааҕытыгар ханнык хамаанда бастыай?

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *