Токио-2020: Мэтээл биһиэннэригэр олох эмп курдук тиксэр 

Япония киин куоратыгар XXXII сайыҥҥы Олимпийскай оонньуулар үгэннээн ыытылла тураллар. Бүгүн чемпион аатын быһаарар финаллар алтыс күннэрэ. Маныаха Россия хамаандата 1 кыһыл көмүс, 1 үрүҥ көмүс, 3 боруонса мэтээли ылары ситистэ. Мэтээли кимнээх аҕаллылар?

Бастакынан мэтээли дьахталларга икки киһилээх оҥочонон сырсыыга хамаандабыт аҕалла. Ол курдук, Василина Степанова уонна Елена Орябинская – Новай Зеландия спортсменнарыгар сабырыйтаран, биэтэккэ иккиһинэн кэллилэр. Ол аата, үрүҥ көмүс мэтээл.

Онтон 100 миэтэрэҕэ көҥүл ньыманан харбааһыҥҥа Климент Колесников, төһө да эрдэтээҥҥи, финалга тахсар иһин харбааһыҥҥа көрдөрбүт бириэмэтин сиппэтэр, үһүс миэстэни ылла.

Дзюдоҕа эр дьоҥҥо 100 киилэҕэ диэри Нияз Ильясов – Россия хамаандатыгар боруонса мэтээли аҕалла.

Киэһэлик фехтованиеҕа дьахталларбыт (Лариса Коробейникова, Инна Дериглазова, Марта Мартьянова, Аделина Загидулина) рапира көрүҥҥэ бүтэһик киирсиигэ француженкалары 45:34 ахсаанынан хотон, өр кэтэһиллибит кыһыл көмүс мэтээлбитин ылар чиэскэ тигистилэр.

Бу күн Россия хамаандатыгар бэһис мэтээли спортивнай гимнастикаҕа биирдиилээн күрэхтэһиигэ Ангелина Мельникова аҕалла. Кини АХШ, Бразилия спортсменнарын кэннилэриттэн үһүс бириистээх миэстэни ылла.

Ким төһө мэтээллэннэ?

(от ыйын 29 күнүнээҕи туругунан)

  1. Кытай – 15+7+9 = 31
  2. Япония – 15+4+6 = 25
  3. АХШ – 14+14+10 = 38
  4. Россия – 8+11+9 = 28
  5. Австралия – 8+2+10 = 20
  6. Англия – 5+7+6 = 18
  7. Корея – 4+3+5 = 12
  8. Франция – 3+5+3 = 11
  9. Германия – 3+3+7 = 13
  10. Италия – 2+7+10 = 19.

Бүгүҥҥү күҥҥэ 59 дойду олимпийскай мэтээлгэ тигистэ. Итинтэн 31-рэ кыһыл көмүс мэтээллээх.

Онон, бу күҥҥэ диэри Россия олимпийскай хамаандата барыта 8 кыһыл көмүс, 11 үрүҥ көмүс уонна 9 боруонса мэтээллэннэ итиэннэ официальнайа суох ааҕыыга син биир төрдүс миэстэҕэ сылдьар. Ылан көрдөххө, биһиги олимпиецтарбыт дьиҥ кыахтарын ситэ арыйан көрдөрбөккө, аһыллыбакка сылдьаллар диэххэ сөп. Мэтээл биһиэннэригэр олох хайдах эрэ, ыараханнык көстөр, сэдэх эмп курдук тиксэр…

«Дьулурҕан».

Хаартыскаҕа: Фехтование рапира көрүҥэр Россия дьахталларга хамаандата тэҥнээҕин булбата.

  

Добавить комментарий

Ваш адрес email не будет опубликован. Обязательные поля помечены *