Токио-2020: Көҥүл тустууга 86 кг сэрэбиэйин ырытыы

Япония киин куоратыгар сайыҥҥы Олимпийскай оонньуу көҥүл тустууга күрэхтэһиитигэр 57 уонна 86 кг ыйааһыннарга сэрэбиэй оҥоһулунна. Ким кими кытта ханнык бөлөххө киирбитэ быһаарылынна.

Бу иннинэ 57 киилэ сэрэбиэйин ырыппыппыт, аны 86 кг ыйааһыны көрүөххэ.

Манна рейтинг быһыытынан иранец Яздани уонна индус Пуния, итиэннэ Амине (Сан Марино) уонна россиянин Найфонов эрдэ көрсүбэттэрин инниттэн, атын туспа бөлөххө араарыллыбыттара.

Дьэ, үөһээ бөлөххө ылан көрдөххө, олимпийскай чемпион Яздани уонна Евопа чемпиона Найфонов атыттартан чорбойоллор. Манна өссө, көбүөр хаһаайына Сосуке Такатани орооһуон сөп. 2004 сыллаахха Афиныга Сажид Сажидов 84 киилэҕэ Олимпиадаҕа фаворит быһыытынан ааҕыллар этэ. Ол эрээри, кореец Мун Ей Хаҕа хотторон кэбиспитин өйдөөн кэллим. Онон, Найфоновка – Такатани сэрэхтээх диэхпин баҕарабын.

Бу ыйааһыҥҥа, аллараа бөлөххө американец Дэвид Тейлор балаһыанньата ордук курдук эбит. Кини – Шабановы, Аминены, Пунияны баһыйара буолуо дии саныыбын.

Онон, ырытан көрдөххө, финалга Яздани уонна Тейлор тахсыахтара. Ол эрдэттэн элбэх киһи, тустууну таптааччы баҕарар хапсыһыыта күүтүллэр. Дьэ, хайалара кыайыай?

Ханныгын да иһин, бу иннинээҕи суруйууга эппитим курдук, Олимпиада ураты тыыннаах. Ким бу күрэхтэһиигэ бэйэтин тустар маастарыстыбатын муҥутуур чыпчаалыгар сөптөөхтүк эрчийэн аҕалбыт, ыйааһынын үчүгэйдик оҥорбут, этэргэ дылы, кытаанах характердаах, кыайыыга дьулуурдаах – ол кыайыаҕа.

Оттон Найфонов хайдах тустуой диэн ыйытар буоллаххытына, Словакияттан кыттар бэйэтин биир дойдулааҕа осетин Борис Макоевы хотуоҕа. Такатанилыын дьэ кытаанах тустуу буолара буолуо. Кыайыан да сөп, хотторон даҕаны кэбиһиэн сөп. Оттон кыайар түгэнигэр, финал аҥаарыгар Язданилыын көрсөр… уонна боруонса мэтээл иһин тустар кыахтанар.

Чэ, биһиги сылыктыыбыт, оттон ким кыайарын көбүөр бэйэтэ көрдөрүө.

Тустуу сарсын, Саха сирин бириэмэтинэн күнүс 11:00 чаастан саҕаланар.

Петр ПАВЛОВ.        

Добавить комментарий

Ваш адрес email не будет опубликован. Обязательные поля помечены *