Токио-2020: Көҥүл тустууга 57 кг сэрэбиэйин ырытыы

Япония киин куоратыгар XXXII сайыҥҥы Олимпийскай оонньуу көҥүл тустууга күрэхтэһиитин бастакынан саҕалыыр икки ыйааһыҥҥа сэрэбиэй ыытылынна. Ол курдук, 57 уонна 86 кг ыйааһыннарга кими кими кытта киирсэрэ быһаарылынна.

57 киилэҕэ диэри 16 бөҕөс икки бөлөҕүнэн сэрэбиэй быһыытынан арахсан тустуоҕа. Балаһыанньаҕа олоҕуран, үрдүк рейтиннээх серб Стефан Мичич уонна россиянин Завур Угуев итиэннэ турок Сулейман Атли уонна индус Рави Кумар – эрдэ утары көрсүспэттэрин курдук, туспа бөлөхтөргө араарылыннылар.

Олимпиада – ураты тыыннаах. Манна ханнык баҕарар соһуччу түмүгү кэтэһиэххэ сөп. Бастакы эргииргэ үөһэ бөлөххө серб Мичич уонна японец Такахаши тустуулара тыҥааһыннаах буолуон сөп. Ол эрээри, Такахашига ыалдьабын. Салгыы тустууларга Санаев, Вангелов, Рави – утарсааччыларын хотуохтара дии саныыбын. Онтон финал чиэппэригэр Такахаши – Санаев, Вангелов – Рави көрсүөхтэрин сөп.

Ол кэмҥэ аллараа бөлөххө, өссө үрдүк тыҥааһыннаах хапсыһыылар ыытыллаллара күүтүллэр. Этэргэ дылы, киһи, ким кыайарын сылыктыан да туттунуохха айылаах. Ол аата, бу бөлөххө, арыый күүстээхтэр түмсүбүттэр. Ол курдук, Атли – Атри, Арутюнян – Эрдэнэбат, Лю – Абдуллаев, Угуев – Гилман киирсиилэригэр чуо бу бөҕөс кыайыа дииргэ ыарахан.

Манна, инники аатыҥ-суолуҥ, ситиһииҥ аахсыллыбат, эн ким да буол. Кырдьык, Олимпиадаҕа маастарыстыба эрэ быһаарбат, манна бастакы уочаракка психологическай бэлэм уонна уйанын-хататын турар. Ким кытаанах характердаах, кыайыыга дьулуурдаах – ол кыайыаҕа.

Чэ, харахпын быһа симэн баран, бу ыйааһыҥҥа финалга японец Юки Такахаши уонна россиянин Завур Угуев көрсөллөр диибин. Эһиги туох дии саныыгытый?

Олимпиада тустуутун салгыы ырытыыны уонна күрэхтэһии хаамыытын биһиги сайтпытыгар http://dzulurgan.ru кэтээн көрөргүтүгэр сүбэлиибит.

Сэрэбиэй – сэрэбиэйинэн, аны бөҕөстөр сарсын сарсыарда ыйааһыннаныыны бараллар уонна биһиги бириэмэбитинэн 11:00 чаастан барыллааһын хапсыһыылар саҕаланаллар.  

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *