Токио-2020: Кубинец Михейн Лопес уһулуччу көрдөрүүтэ!

Япония киин куоратыгар буола турар XXXII сайыҥҥы Олимпийскай оонньуу спортивнай тустууга бастакы финаллара ыытылыннылар. Ол курдук, гректии-римнии тустууга икки, дьахталлар тустууларыгар биир ыйааһыҥҥа чемпионнар уонна призердар кимнээх буолаллара быһаарылынна.

Бу күн Олимпиада биир чаҕылхай геройунан Куба аатырбыт бөҕөһө, аан дойду биэс төгүллээх чемпиона, 38 саастаах Михейн Лопес Нуньес буолла. Кини финалга, бу иннинэ биһиги Сергей Семеновпытын хоппут грузин Якоб Каджаяны 5:0 ахсаанынан эрэллээхтик кыайда. Итиэннэ гректии-римнии тустууга субуруччу түөрт төгүллээх олимпийскай чемпион буолан, уһулуччу көрдөрүүнү ситистэ (2008, 2012, 2016, 2020). Манан Лопес – үс төгүллээх олимпийскай чемпион Александр Карелин көрдөрүүтүн куоһарда. Оттон спортивнай тустуу историятыгар иккис киһинэн, 4 төгүллээх олимпийскай чемпионунан буолла. Кини иннинэ маннык чаҕылхай көрдөрүүнү японка Каори Ичо ситиспитэ.

Михейн Лопес билигин даҕаны кыахтаах эбит. Төҕө эмэ сыралаах, илистиилээх хапсыһыы кэнниттэн үөрүүтүттэн, кинини көбүөргэ эҕэрдэлии киирбит тренердэрин биирдэрин кылбардык халбарыйан быраҕан түһэрдэ, оттон иккистэрин көтөҕөн ылан баран, түһүлгэни эргийдэ. Эбиитин, үгэс быһыытынан Куба национальнай былааҕын күөрэппитинэн көбүөрү эргийдэ. Манан, кубинец өссө даҕаны күүстээҕин, аны үс сылынан Парижка буолар Олимпийскай оонньууларга кыттар кыахтааҕын көрдөрдө.

Спортивнай тустуу бастакы финалларын түмүгэ:   

Эр дьон 60 кг:

1.Луис Орта Санчес – Куба

2.Кенихиро Фумита – Япония

3.Саилак Валихан – Кытай

3.Сергей Емелин – Россия.

Эр дьон 130 кг:

1.Михайн Лопес – Куба

2.Якоб Каджая – Грузия

3.Риза Каялп – Турция

3.Сергей Семенов – Россия.

Дьахталлар 76 кг

1.Алин Роттер Фоккен – Германия

2.Аделина Грей – АХШ

3.Ясемин Адар – Турция

3.Чжоу Цянь – Кытай.

Аны сарсын эмиэ үс ыйааһыҥҥа (гректии-римнии тустууга 77, 97 кг, дьахталлар тустууларыгар 68 кг) финаллар ыытыллыахтара. Россияттан 97 киилэҕэ Муса Евлоев – Артур Алексаняны (Армения) кытта ким чемпион буоларын быһаарсыахтара. Ону тэҥэ сарсын – эбии үс ыйааһыҥҥа (гректии-римнии тустууга 67, 87 кг, дьахталларга 62 кг) хапсыһыылар саҕаланыахтара.

«Дьулурҕан».

Добавить комментарий

Ваш адрес email не будет опубликован. Обязательные поля помечены *