Токио-2020: Заурбек Сидаков – олимпийскай чемпион!

Япония киин куоратыгар XXXII сайыҥҥы Олимпийскай оонньуу спортивнай тустууга көрүҥэр үс ыйааһыҥҥа финаллар ыытыллан түмүктэннилэр. Олортон эр дьоҥҥо икки ыйааһыҥҥа Россия уонна АХШ хамаандалара кыһыл көмүс мэтээли ылары ситистилэр, оттон дьахталларга — Япония.

Хотугу Осетия тустууга оскуолатын иитиллээччитэ, аан дойду икки төгүллээх чемпиона Заурбек Сидаков (74 кг) финалга Беларусь Республикатын аатыттан кыттар дагестанец Магомедхабиб Кадимагомедовы 7:0 ахсаанынан эрэллээхтик хотон, олимпийскай чемпионунан буолла. Бу ыйааһыҥҥа эрдэттэн биир күүстээҕинэн биллибит американец Кайл Дэйк үһүс миэстэҕэ таҕыста.

Ыарахан ыйааһыҥҥа Россия чемпиона Сергей Козырев бастакы эргииргэ китаец Дэнг Живейгэ хотторон, эрдэ туораабыта, оттон киһитэ боруонса мэтээл иһин киирсиигэ иранец Зареҕа сабырыйтаран, бэһис буолла.

Оттон чемпионунан бу ыйааһыҥҥа ким даҕаны улаханнык кэтэспэтэх киһитэ, норуоттар икки ардыларынааҕы түһүлгэҕэ өссө биллэ-көстө илик АХШ чемпиона, 21 саастаах Гейбл Дан Стивесон буолла. Кини чахчы кыахтаахтык бастаата. Бу ыйааһын чулууларын: олимпийскай чемпион турок Таха Акгулу уонна финалга аан дойду хас да төгүллээх чемпиона, Олимпиада призера грузин Гено Петриашвилины кыайталаата. Гейбл Стивесоны — олимпийскай көбүөр арыйыытынан ааттыахха сөп.

Бүгүҥҥү финаллар түмүктэрэ:

74 кг

1.Заурбек Сидаков – Россия

2.Магомедхабиб Кадимагомедов – Беларусь

3.Кайл Дэйк – АХШ

3.Бекзод Абдурахмонов – Узбекистан.

125 кг

1.Гейбл Стивесон – АХШ

2.Гено Петриашвили – Грузия

3.Амир Заре – Иран

3.Таха Акгюль – Турция.

53 кг

1.Маю Мукаида – Япония

2.Пан Цаню – Кытай

3.Ванесса Колодзинская – Беларусь

3.Очир Болортуя – Монголия.

Спортивнай тустууга күрэхтэһии сарсын түмүктэнэр. Оттон билиҥҥи туругунан АХШ хамаандата тустуу үс көрүҥэр — 3 кыһыл көмүс, 1 үрүҥ көмүс, 3 боруонса мэтээллээх инники иһэр. Россия 3 бастакы, 3 үһүс миэстэлээх. Салгыы Япония (3, 1, 1), Иран (1, 1, 2), Украина (1, 1, 2) хамаандалара иһэллэр.

Оттон бүгүҥҥү саҕаламмыт ыйааһыннарга 65 кг ыйааһыҥҥа Гаджимурад Рашидов – Армения, Польша бөҕөстөрүн кыайталаан баран, финалга тахсар иһин киирсиигэ японец Такуто Отогуроҕа 2:3 ахсаанынан хотторон кэбиһэн, сарсын боруонса мэтээл иһин киирсэр буолла.

Онтон Абдулрашид Садулаев (97 кг) эмиэ икки утарсааччытын хотон баран, салгыы күрэхтэһиигэ кубинец Рейнерис Салаһы 4:0 хотон, финалга таҕыста. Кини олимпийскай чемпион Кайл Снайдеры кытта тустуоҕа итиэннэ Олимпиада икки төгүллээх чемпиона буоларга дьулуһуоҕа.

Сарсыҥҥы финаллар:

65 кг Такуто Отогуро (Япония) – Гаджи Алиев (Азербайджан)

97 кг Абдулрашид Садулаев (Россия) – Кайл Снайдер (АХШ)

53 кг Юи Сусаки (Япония) – Сун Янань (Кытай).

Тустуу сарсын, атырдьах ыйын 7 күнүгэр Дьокуускай бириэмэтинэн «уоскутар» бөлөх 18:45 чааска, оттон финал 19:30 чааска саҕаланар.

«Дьулурҕан».

Добавить комментарий

Ваш адрес email не будет опубликован. Обязательные поля помечены *