Токио-2020: Завур Угуев финалга тустуоҕа

Япония киин куоратыгар XXXII сайыҥҥы Олимпийскай оонньууларга бүгүн спортивнай тустуу программатыгар үс ыйааһыҥҥа мэтээллэр оонньоннулар. Онуоха Россия спортсменнарыттан Любовь Овчарова уонна Артем Сурков бэһис миэстэнэн дуоһуйдулар.

Сиһилии соҕус билиһиннэрдэххэ, гректии-римнии тустууга аан дойду чемпиона Артём Сурковпыт (67 кг) үһүс миэстэ иһин киирсиигэ Египет бөҕөһүгэр 1:1 ахсааҥҥа хотторуулааҕынан ааҕылынна. Онон бэһис миэстэлэнэргэ күһэлиннэ. Оттон 87 киилэҕэ Россия хамаандата киһитэ суоҕа. Олимпиадаҕа сүүмэрдиир күрэхтэһиигэ олимпийскай чемпион Давид Чакветадзе хотторон кэбиспитэ.

Бүгүҥҥү финаллар түмүктэрэ:

Гректии-римнии тустуу.

Эр дьон 67 кг:

1.Мухаммад Гераеи (Иран)

2.Парвиз Насибов (Украина)

3.Мохамед Эль-Сайед (Египет)

3.Франк Штеблер (Германия).

Эр дьон 87 кг

1.Жан Беленюк (Украина)

2.Виктор Лоринц (Венгрия)

3.Денис Кудла (Германия)

3.Зураб Датунашвили (Сербия)

Дьахталлар 62 кг

1.Юкако Каваи (Япония)

2.Айсулуу Тыныбекова (Кыргызстан)

3.Тайбе Юсейн (Болгария)

3.Ирина Коляденко (Украина).

Онон бүгүҥҥүнэн гректии-римнии тустааччылар күрэхтэһиилэрэ түмүктэннэ. Иран, Венгрия, Россия, Украина биирдии, Куба икки чемпионнаах. Россиялар өссө икки боруонса мэтээллээхтэр (Сергей Емелин – 60 кг, Сергей Семенов – 130 кг).

Оттон бүгүн көҥүл тустууга күрэхтэһии саҕаланна. Биһигиттэн Завур Угуев (57 кг) – АХШ, Узбекистан, Иран бөҕөстөрүн кыайталаан финалга таҕыста. Оттон иккис кыттааччыбыт – Артур Найфонов финалга тахсар иһин хапсыһыыга Иран сулуһугар Хасан Язданига күттүөннээх утарсыыны оҥорбото, 1:7 ахсаанынан хоттордо. Онон сарсын кини боруонса мэтээл иһин тустуоҕа.

Сарсын финалга көрсүөхтэрэ:

Көҥүл тустууга

57 кг: Завур Угуев (Россия) – Кумар Рави (Индия).

86 кг: Хасан Яздани (Иран) – Дэвид Тэйлор (АХШ)

Дьахталлар тустууларыгар

57 кг: Рисако Каваи (Япония) – Ирина Курочкина (Беларусь).

Сарсын, атырдьах ыйын 5 күнүгэр тустуу Саха сирин бириэмэтинэн күнүс 11:00 чааска саҕаланыаҕа. Онно 74 уонна 125 кг ыйааһыннаахтар күөн көрсүөхтэрэ. Биһиги күөн туттар бөҕөспүт Айаал Лазарев американец Гейбл Стивесоннуун тустуоҕа. Итини тэҥэ Россияттан Заурбек Сидаков уонна Сергей Козырев киирсиэхтэрэ.

«Дьулурҕан».

Добавить комментарий

Ваш адрес email не будет опубликован. Обязательные поля помечены *