Токио-2020: Завур Угуев – олимпийскай чемпион! Найфонов – үһүс

Япония киин куоратыгар сайыҥҥы Олимпийскай оонньуу спортивнай тустууга бастакы финаллара түмүктэннилэр. Көҥүл тустууга – икки, дьахталлар тустууларыгар – биир ыйааһыҥҥа чемпионнар уонна призёрдар ааттара билиннэ.

57 киилэҕэ аан дойду икки төгүллээх чемпиона, дагестанец, омугунан кумык Завур Угуев – бэҕэьээ АХШ, Узбекистан, Иран бөҕөстөрүн кыайталаан баран, бүгүн финалга Индия бөҕөһүн эрэллээхтик кыайан, олимпийскай чемпион буолла. Манна даҕатан эттэххэ, эмиэ бүгүн 57 кг ыйааһыҥҥа боксаҕа эмиэ Дагестантан Альберт Батыргазиев чемпионнаата. Кини омугунан – ногаец.

Бу ыйааһыҥҥа Артас Санаа (Нурислам Санаев) үһүс миэстэҕэ тахсан, Тыва Республикатын спорка историятыгар бастакы олимпийскай мэтээли аҕалла.

86 киилэҕэ Россия чемпиона Артур Найфонов күрэхтэһиини үчүгэйдик саҕалаан баран, финалга тахсар иһин хапсыһыыга иранец Хасан Язданига хотторон кэбиспитэ. Оттон бүгүн кини Олимпиада боруонса мэтээлин ким ыларын быһаарар киирсиигэ Узбекистан хамаандатыттан кыттар дагестанец Шапиевы хотон, пьедестал үһүс үктэлигэр таҕыста. Бу эмиэ үчүгэй көрдөрүү.

Онон көҥүл тустуу бастакы финалыгар Россия хамаандата икки мэтээллэннэ.

Бүгүҥҥү финаллар түмүктэрэ:

57 кг.

1.Завур Угуев – Россия

2.Кумар Рави – Индия

3.Нурислам Санаев – Казахстан

3.Томас Гилман – АХШ.

86 кг.

1.Дэвид Тэйлор – АХШ

2.Хасан Яздани – Иран

3.Артур Найфонов – Россия

3.Майлз Амин – Сан-Марино.

57 кг.

1.Рисако Каваи – Япония

2.Ирина Курочкина – Беларусь

3.Эвелина Николова – Болгария

3.Хелен Марулис – АХШ.

Аны сарсын, атырдьах ыйын 6 күнүгэр – 74 уонна 125 кг ыйааһыннарга финаллар буолуохтара. Онуоха Россияттан аан дойду икки төгүллээх чемпиона Заурбек Сидаков чемпион аатын былдьаһыаҕа. Биһиги Айаал Лазаревпыт «уоскутар» бөлөххө киирэн, олимпийскай чемпион Таха Акгулу (Турция) кытта тустуоҕа.

Сарсыҥҥы финаллар:

74 кг Заурбек Сидаков (Россия) – Магомедхабиб Кадимагомедов (Беларусь).

125 кг Гено Петриашвили (Грузия) – Гейбл Стивесон (АХШ).

Тустуу, Дьокуускай бириэмэтинэн күнүс 11:00 чаастан саҕаланыаҕа.

«Дьулурҕан».

Добавить комментарий

Ваш адрес email не будет опубликован. Обязательные поля помечены *