Токио-2020: Владимир Балынец Паралимпиадаҕа тоҕо барбата?

Сарсыҥҥыттан, атырдьах ыйын 24 күнүттэн, Япония киин куоратыгар Токиоҕа, доруобуйаларынан хааччахтаах спортсменнар Олимпиадалара – XVI сайыҥҥы Паралимпиада саҕаланар. Бу, Паралимпийскай оонньууларга биһигиттэн Анастасия Диодорова харбааһыҥҥа, Степанида Артахинова оҕунан ытыыга уонна Алена Дмитриева олорон эрэн волейболга күрэхтэһиэхтэрэ.

Түөрт сылга биирдэ ыытыллар оонньууларга биир саамай киэн туттар спортсмеммыт, пауэрлифтиҥҥэ Лондоннааҕы-2012 Паралимпиада үрүҥ көмүс призера, Россия 16, аан дойду 2, Европа 5 төгүллээх чемпиона, спорт үтүөлээх маастара Владимир Балынец сүүмэрдэммит хамаанда састаабыгар киирбэтэҕиттэн элбэх спорду таптааччы соһуйда. Манан сибээстээн биһиги, Владимир тус тренерэ, Россия үтүөлээх тренерэ Петр Николаевич Давыдовтан, быһааран биэрэригэр көрдөстүбүт.

-Хас биирдии олимпийскай циклга спорт көрүҥэр бастыҥнары сүүмэрдиир күрэхтэһиилэр ыытыллаллар. Ол күрэхтэһиилэр түмүктэринэн спортсменнар аан дойдутааҕы рейтиҥҥэ киирэллэр. Ол курдук, пауэрлифтиҥҥэ 2017, 2018, 2019 сылларга – Токиотааҕы Паралимпиадаҕа туһуламмыт сүүмэрдиир күрэхтэһиилэр: 2017 с. аан дойду чемпионата Мексикаҕа, 2018 с. Европа чемпионата Парижка, 2019 с. аан дойду чемпионата Нурсултаҥҥа (Казахстан) ыытыллыбыттара. Онно, санкциянан сибээстээн 2017-2018 сс. Россия паралимпиецтара бары аан дойдутааҕы күрэхтэһиилэргэ кыттыбатахтара. Ол саҕана, бу хайдахтаах охсууну аҕалыаҕын биһиги билбэт этибит.

Россияны утары санкция содуллара

2016 сыллаахха Рио-де-Жанейро куоракка 15-с Паралимпийскай оонньууларга Россия кыттыыны ылбатаҕын билэҕит. Ити барыта, 2014 с. Сочига буолбут кыһыҥҥы Олимпийскай уонна Паралимпийскай оонньуулар түмүктэринэн Родченков “көмөтүнэн” Россия сүүмэрдэммит хамаандата олорчу кыттыыны ылбатаҕа.

2019 сыллаахха Россияны утары санкция бүтээтин кытта, биһиги Владимир Балынецтыын Нурсултан куоракка тиийэммит туох баар күүстээх утарсааччыларбытын барыларын сирэй көрсөн кыайаммыт, аан дойду чемпионун үрдүк аатын ылабыт. Итиэннэ рейтиммитим үөһээ таһаарабыт. Онон Токиотааҕы Паралимпиадаҕа, мэтээлгэ суоттанар биир претендент буола түһэбит. Биһиги үөрэбит-көтөбүт, дьарыкпыт үчүгэй, результаппыт үчүгэй. Онон эрчиллиибитин салҕаан барабыт.

Ыраас халлааҥҥа этиҥ эппитинии…

Онтон дьэ, соһуччу, көһүтүллэбэтэх сураҕы истэбит. Ол курдук, бу дьыл от ыйын 13 күнүгэр Аан дойдутааҕы Паралимпийскай комитет – Токиотааҕы оонньууларга кыттар спортсменнар ааттарын испииһэгин таһаарар. Арай, онно көрбүппүт, биһиги спорпут көрүҥэ уонна кыттыахтаах пауэрлифтердар ааттара суох.

Ылан көрдөххө, пауэрлифтиҥҥэ Россия 14 спортсмена – аан дойду бастыҥнарын ахсааннарыгар сылдьар. Бары именной лицензия ылыахтаах этилэр. Кинилэр Токиоҕа кыттар бырааптара быһыллан хаалла.

Мин санаабар, ити санкция ылыллыбытын Россия Паралимпийскай комитета биһиэхэ тутатына иһитиннэрбэтэҕэ сүрдээх хомолтолоох. Биһиги эрдэттэн баҕар альтернативнай тугу эмэ ылыныа этибит. Холобур, нейтральнай атлет буолан, киириэххэ эмиэ сөп. Ити аан дойду спорка практикатыгар баар. Биһиги ону туһаныахпытын сөп этэ. Ону биһиги бары болдьоҕу барытын куоттаран кэбиспиппит…

Спорка олохпутугар улахан охсууну ыллыбыт

Токиотааҕы Паралимпиада пауэрлифтиҥҥэ күрэхтэһиитэ атырдьах ыйын 26 күнүттэн – балаҕан ыйын 5 күнүгэр диэри буолар. Ыйааһыннарынан. Онон, 26-с чыыһылаҕа Балынец барбыта буоллар, сарсыарда 10 чааска помостка тахсыахтаах этэ.

Ол гынан баран, маннык буолла: Аан дойдутааҕы Паралимпийскай комитет Россия икки спортсмен-кыыһыгар, кыттар быраабы биэрдэ. Ол хайдах бэриллэрий уонна ханнык дойдуга диэтэххэ, пауэрлифтинг көрүҥүн аан дойдуга пропагандалыыр сыалтан аан дойдутааҕы рейтиҥҥэ киирбэтэх спортсменнарга уонна дойдуларга биэрэллэр. Дьэ, Россияҕа кытта итинник кытаанахтык, сиэрэ суохтук сыһыаннастылар.

Маннык улахан охсууну биһиги 2016 сыллаахха эмиэ ылбыппыт. Этэргэ дылы, шок ылбыппыт. Бэлэмнэнии бөҕөтө, чемпион бөҕөтө буола сылдьаммыт, кыайан кыттыыны ылбатахпыт. Ону син аһардыбыт буоллахпытына, билиҥҥи охсууну өссө ыарыылаахтык ылынныбыт. Күн-дьыл баран иһэр. Тоҕус сылы быһа кэтэспит улахан күрэхтэһиибитигэр эмиэ туоратыллан хааллыбыт. Тустаах дьоҥҥо ити наһаа ыарахан. Биһигиттэн тутулуга суох быһаарыынан, хаалан хааллыбыт. Отой ыарахан, быһата, билигин хайдах буолуохпутун билбэккэ, шоковай состояниеҕа сылдьабыт. Күн бүгүнүгэр диэри, баҕар туох эрэ хамсааһын буолуо диэн эрэнэ саныыбыт.

Спортсмен иннигэр буруйдаах курдук сананабын

Ол быыһыгар, 2024 сыллаахха Парижка буолуохтаах Паралимпийскай оонньууларга сүүмэрдиир күрэхтэһиилэр саҕаланаллара чугаһаата. Сэтинньи бүтүүтэ Батуми (Грузия) куоракка, аан дойду чемпионата ыытыллар. Манна биһиги эбэһээт кыттыыны ылыахтаахпыт. Билигин Володя кыһыйа-абара сылдьар, нууччалыы эттэххэ, “злой и сильный”. Онон Францияҕа хайаан даҕаны икки Олимпиаданы көтүппүппүтүн кыһыйан-абаран туран, туох барыта үһүстээх диэн баран, тоҕо түһэн кэбиһиэхтээхпит.

Бу уустук балаһыанньанан эттэххэ, хас биирдии тренер уонна спортсмен бэйэлэрин бырааптарын уонна эбээһинэстэрин, араас усулуобуйалары, балаһыанньалары, юридическай сокуоннары билиэхтээхтэр дии саныыбын. Холобур, Россияны утары санкция оҥорон туораттылар дии, ити спортсмены буолбатах, дойдуну туораттылар. Маннык түгэҥҥэ спортсмен нейтральнай статус ылан кыттар бырааптаах. Ону эккирэтэн, туруорсан ыларгар чопчу болдьохтор уонна ирдэбиллэр бааллар. Ити кыаҕы биһиги куоттаран кэбистибит. Биллэн турар, мин тренер киһи быһыытынан спортсмен иннигэр буруйдаах курдук сананабын.

Бу буолбут балаһыанньаҕа Саха сирин дьоно күүстээх самныбат санаалаах буоларгытыгар ыҥырабын! Бары бииргэ түмсэммит, 2024 сыллааҕы оонньууларга бэлэмнэниибитин күүскэ, сөптөөхтүк ыытарбытыгар баҕарабын. Владимир Балынец хайаан да ситиһиилэниэ!

Кэпсэттэ Петр ПАВЛОВ.                

Добавить комментарий

Ваш адрес email не будет опубликован. Обязательные поля помечены *