Токио-2020: Бүгүн Россия хамаандата үс мэтээллэннэ

Япония киин куоратыгар XXXII сайыҥҥы Олимпийскай оонньууларга кыайыылаах аатын быһаарар күрэхтэһии ахсыс күнэ түмүктэннэ. Бу күн Россия хамаандата 1 кыһыл көмүс, 1 үрүҥ көмүс, 1 боруонса мэтээли ылары ситистэ. Биһиги хамаандабытыгар кимнээх ситиһиилэннилэр?

От ыйын бүтэһик күнүгэр Россия хамаандатыгар кыһыл көмүс мэтээли фехтование сабля көрүҥэр дьахталлар хамаандалара (София Позднякова, Софья Великая, Ольга Никитина, Светлана Шевелева) аҕалла. Кинилэр быһаарыылаах киирсиигэ Франция хамаандатын кыайдылар. Эрдэлээн эттэххэ, фехтовальшиктарбыт бу оонньууларга ситиһиилээхтик кытта сылдьаллар.

Россия ытааччыларын Токиоҕа көрдөрүүлэрэ эмиэ үчүгэй диэххэ сөп. Ол курдук, бүгүн дьахталларга кыра калибрдаах бинтиэпкэнэн 50 м ытыыга Юлия Зыкова иккис, Юлия Каримова үһүс буоллулар. Ол аата, биир үрүҥ көмүс, биир боруонса мэтээл эбилиннэ.

Олимпиадаҕа соһуччу түмүк элбэх. Олортон биирдэстэринэн, оонньууларга саҥа киллэриллибит дзюдоҕа хамаанданан киирсиигэ, кыайыылаах аатын ким ыларын быһаарар көрсүһүүгэ японецтар французтарга хотторуулара, мин санаабар – соһуччу көрдөрүү. Буолан баран, 1:4 ахсаанынан туох даҕаны мөккүөрэ суох хоттордулар.

Ким төһө мэтээллэннэ?

(От ыйын 31 күнүн түмүгүнэн)

Кытай – 21+12+12 = 45

Япония – 17+5+8 = 30

АХШ – 16+17+13 = 46

Россия – 11+15+11 = 37

Австралия – 10+3+14 = 27

Англия – 8+9+11 = 28

Корея – 5+4+7 = 16

Франция – 4+9+6 = 19

Голландия – 4+7+5 = 16

Новай Зеландия – 4+3+3.

Онон бу күн мэтээлбит кэмчи буолла. Үс эрэ – фехтованиеҕа хамаанданан кыһыл көмүс уонна ытыыга – биирдии үрүҥ көмүс уонна боруонса. Ол да буоллар, билигин даҕаны төрдүс миэстэҕэ сылдьабыт.

Бу күҥҥэ диэри барыта 70 дойду спортсменнара олимпийскай мэтээлгэ тигистилэр. Итинтэн 40-нэ кыһыл көмүстээх.

Аны сарсыҥҥыттан, атырдьах ыйын 1 күнүттэн — спортивнай тустууга күрэхтэһиилэр саҕаланаллар. Көбүөргэ гректии римнии тустууга аан дойду чемпиона Сергей Емелин (60 кг), ааспыт Олимпиада боруонса призера Сергей Семенов (130 кг) уонна дьахталлар тустууларыгар олимпийскай чемпион Наталья Воробьева (76 кг) тахсыахтара.

«Дьулурҕан».

Добавить комментарий

Ваш адрес email не будет опубликован. Обязательные поля помечены *