Токио-2020: Бурятияттан үс спортсмен кыттар. Кинилэр кимнээҕий?

Бүгүн, от ыйын 23 күнүгэр бээтинсэҕэ, киэһэ 20:00 чаастан Киин телевидение бастакы канаалыгар Токиоҕа, XXXII сайыҥҥы Олимпийскай оонньуулары үөрүүлээхтик аһыы быһа биэриитин тулуйбакка кэтэһэбит!

Япониятааҕы Олимпиада туһунан сырдатыыбытын сайтка салгыыбыт. Биллэрин курдук, быйылгы Олимпийскай оонньууларга Саха сириттэн тустуук Айаал Лазарев (Кыргызстан, 125 кг) кыттар. Оттон ыаллыы сытар Бурятия Республикатыттан Токиоҕа үс спортсмен күүһүн холоһор.

Ол курдук, Улан-Удэттэн биир идэлээҕим, суруналыыс Борис Балданов иһитиннэрбитинэн, оҕунан ытааччы Светлана Гомбоева, боксер Людмила Воронцова уонна тустууга Стальвира Оршуш. Кинилэр үһүөн Россия хамаандатыттан аатыттан кытталлар. Манна өссө эбэн эттэххэ, бурят хааннаахтартан Токиотааҕы оонньууларга Забайкальскай кыраайтан охчут Галсан Базаржапов кыттарын санатан тоҕоостоох дии саныыбын.

23 саастаах Светлана Гомбоева аҥардас быйылгы сылга аан дойду Кубогын түһүмэҕэр кыайбыта уонна Европа чемпиона буолбута. Санатан эттэххэ, хамаанда састааба өссө 2019 сыллааҕы аан дойду чемпионатын түмүгүнэн талыллыбыта. Ол курдук, Россия олимпийскай хамаандатыгар Ксения Перова, Елена Осипова уонна Светлана Гомбоева киирбиттэрэ.

Оттон боксаҕа аан дойду чемпионатын үрүҥ көмүс призера, 22 саастаах Людмила Воронцова Олимпиадаҕа арыый үрдүк рейтиннээх буолан киирбитэ. Кини 57 киилэҕэ кыттар.

Европа үс төгүллээх чемпиона, 28 саастаах Стальвира Оршуш 50 киилэҕэ диэри ыйааһыҥҥа тустар. Россия дьахтар тустуутугар хамаандата бу Олимпиадаҕа – 1 кыһыл көмүс, 1 үрүҥ көмүс уонна 1 боруонса мэтээли ылар соруктаах. Оршуш ити мэтээллэртэн бииригэр суоттанар диэххэ сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *