Токио-2020: Бастакы күн түмүгүнэн Россия икки мэтээллээх

Япония киин куоратыгар сайыҥҥы XXXII Олимпийскай оонньуулар аһыллан, бүгүн бастакы финаллар буоллулар. Онуоха Россия, атыннык эттэххэ, бу оонньууларга Россия Олимпийскай комитета диэн аатынан кыттар хамаанда биир үрүҥ көмүс уонна биир боруонса мэтээллэннэ.

Ол курдук, бастакы финаллар ытыыга, дзюдоҕа, фехтованиеҕа, ыарахан атлетикаҕа, оҕунан ытыыга, велоспорка ыытылыннылар. Мэтээлгэ барыта 10 дойду хамаандата тигистэ.

Россия хамаандатыгар бастакы мэтээли сарсыарда Анастасия Галашина аҕалла. Кини пневматическай бинтиэпкэнэн 10 м ытыыга Кытай кыыһыгар кыранан сабырыттаран, үрүҥ көмүс мэтээли ылары ситистэ. Оттон иккис мэтээли киэһэнэн – тхэквондист Михаил Артамонов (58 кг) аҕалла. Кини үһүс миэстэҕэ тахсан, боруонса мэтээлинэн наҕараадаланна.

Бастакы күн кытайдар үс чемпионнаахтар: ытыыга, ыарахан атлетикаҕа уонна фехтованиеҕа. Дьоппуоннар бэйэлэрин төрүт көрүҥнэригэр – дзюдоҕа мэтээллэннилэр. Өссө биирдэрэ 48 кг кыыс финалга Косово спортсменыгар хотторон кэбиспитэ соһуччу буолла. Биир, киһи сэҥээрэр түгэнинэн, Иран хамаандата ытыыга кыһыл көмүстэммитэ буолар.

Манна даҕатан эттэххэ, киһи эрэ барыта, уопсай хамаанданан түмүккэ бастыыр диир, саамай элбэх кыттааччылаах АХШ хамаандата бастакы күн түмүгүнэн биир даҕаны мэтээли ылбатаҕа буолар.

Бастакы финаллар түмүктэринэн мэтээллэри ханнык хамаандалар ыллылар?

Кытай 3 кыһыл көмүс, 1 боруонса мэтээллээх.

Италия 1-дии кыһыл уонна үрүҥ көмүстээх.

Япония 1 кыһыл көмүс, 1 үрүҥ көмүс мэтээллээх.

Корея 1 кыһыл көмүс, 2 боруонса мэтээллээх.

Венгрия, Иран, Косово, Эквадор 1-дии кыһыл көмүстээхтэр.

Россия уонна Сербия 1-дии үрүҥ көмүс, 1-дии боруонса мэтээллээх.

Бельгия 1 үрүҥ көмүс мэтээллээх.

Олимпиада салҕанар. Түөрт сылга биирдэ ыытыллар киһи аймах саамай кэтэһэр, күүтэр спортивнай күрэхтэһиитин сэҥээрэн көрөргүтүгэр ыҥырабын.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *