Токио-2020: Айаал Лазарев «уоскутар» бөлөххө киириэн сөп

Япония киин куоратыгар XXXII сайыҥҥы Олимпийскай оонньуу үгэннээн ыытылла турар. Бүгүн, атырдьах ыйын 5 күнүгэр – көҥүл тустуу күрэхтэһиитин иккис күнүгэр көбүөргэ 74 уонна 125 кг ыйааһыннаахтар барыллааһын хапсыһыылара саҕаланна. Биһиги бары, биир дойдулаахпыт, Кыргызстан Республикатын аатыттан кыттар Азия чемпиона, Аан дойду Кубогын биирдиилээн бастыыр иһин түһүлгэтин призера Айаал Лазарев тустуутун долгуйан туран кэтээтибит.

Билэргит курдук, кини 125 киилэҕэ билиҥҥи кэмҥэ аан дойду 16 бастыҥ бөҕөһүн кэккэтигэр киирэн Олимпиадаҕа кыттара, биһиэхэ долгутулаах да, киэн туттуулаах даҕаны диэххэ сөп.

Айаал утарсааччыта – американец, 21 саастаах Гейбл Стивесон туһунан эттэххэ, кини кадеттарга уонна юниордарга аан дойду күрэхтэһиитигэр бастыы сылдьыбыта. Быйыл саас АХШ Олимпиадаҕа сүүмэрдиир чемпионатыгар бастакы миэстэни ылан, олимпиец аатын ылбыта. Итиэннэ Панамерика континенын чемпионатыгар бастаабыта. Стивесоны – кэскиллээх, инникилээх бөҕөс диэн ааттыыллар, киниттэн элбэҕи кэтэһэллэр.

Ол да буоллар, ханныгын даҕаны иһин, биһиги бэйэбит бөҕөспүтүгэр ыарыйдыбыт. Хомойуох иһин, Айаал американецка сатаан утарсыбата, 0:10 ахсаанынан хотторон кэбистэ. Тус бэйэм, кинилэр тустууларын булан көрбөтүм, онон хайдах быһыылаахтык хотторбутун билиҥҥитэ этэр кыаҕым суох.

Салгыы эргииргэ аны Стивесон – олимпийскай чемпион Таха Акгулу (Турция) 8:0 ахсаанынан хотон, чахчы күүстээҕин итэҕэттэ. Итиэннэ финалга тахсар иһин киирсиигэ монгол баатыра Мунхтуру кытта тустар буолла.

Американец финалга тахсар түгэнигэр, балаһыанньа быһыытынан, Айаал Лазарев «уоскутар» бөлөххө киирэн Таха Акгулу кытта тустуон сөп. Күрэхтэһии салҕанар…

Финал аҥаарыгар таҕыстылар:

74 кг Заурбек Сидаков (Россия) – Данияр Кайсанов (Казахстан)

74 кг Франк Чамизо (Италия) — Магомедхабиб Кадимагомедов (Беларусь)

125 кг Гено Петриашвили (Грузия) — Амир Заре (Иран)

125 кг Гейбл Стивесон (АХШ) — Лхагвагерел Мунхтур (Монголия).

Кинилэр тустуулара бүгүн Саха сирин бириэмэтинэн киэһэ 18:15 чаастан саҕаланыаҕа.

Оттон эмиэ бүгүн 19:30 чаастан финаллар буолуохтара:

57 кг.

Боруонса мэтээл иһин:

Георгий Вангелов (Болгария) – Нурислам Санаев (Казахстан)

Томас Гилман (АХШ) – Реза Атри (Иран)

Финал:

Заур Угуев (Россия) – Рави Кумар (Индия).

86 кг.

Боруонса мэтээл иһин:

Жабраил Шапиев (Узбекистан) – Артур Найфонов (Россия)

Майлс Амине (Сан-Марино) – Дипак Пуния (Индия)

Финал:

Хасан Яздани (Иран) — Дэвид Тейлор (АХШ).

Дьахталлар тустуулара

57 кг.

Боруонса мэтээл иһин:

Хонзоргул Болдсайхан (Монголия) – Хелен Марулис (АХШ)

Валерия Коблова (Россия) – Эвелина Николова (Болгария)

Финал:

Рисако Каваи (Япония) – Ирина Курочкина (Беларусь).

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *